Arsebispu Arkidioseze Metropolitana Dili, Don Virgílio do Carmo da Silva. Imajen Tatoli/Egas Cristóvão

DILI, 07 juñu 2022 (TATOLI)—Primeiru-Ministru (PM), Taur Matan Ruak, tersa ne’e, parabeniza ba Arsebispu Arkedioseze Metropolitana Dili, Don Virgílio do Carmo da Silva, hafoin hetan nomeasaun hosi Amu Papa Francisco sai Karedeál dahuluk iha Timor-Leste, iha loron 29 maiu 2022.

“Ohin ha’u mai vizita ita-nia Amu Bispu Don Virgílio, hanesan ha’u-nia vizita dahuluk hafoin ita-nia Amu Bispu hetan nomeasaun hosi Amu Papa Francisco sai Kardeál dahuluk iha Timor-Leste,” PM Taur hateten hafoin hala’o vizita ba Don virgílio  iha Kámara Ekleziástika, Bidau Lecidere.

Nia dehan, iha hasoru malu ne’e, la’ós de’it pesoalmente transmite nia sentimentu kontente no parabeniza ba Don Virgílio, maibé mós hakarak hatene oituan kona-ba lala’ok hafoin simu Kardeál nian ba oin, tanba hanesan Governu bele halo akompañamentu.

“Maibé hosi parte igreja seidauk iha informasaun kontreta, entaun bainhira iha ajenda no informasaun loloos mak sei fahe ba ami,” nia akresenta.

Tuir informasaun iha fulan-rua tuir mai Don Virgílio sei simu pose hanesan Karedál.

Ba kestaun ne’e, Xefe Governu dehan Governu sei buka informasaun konkreta maibé naturalmente inisiativa ne’e, hanesan sarani Timór hotu-hotu hakarak partisipa.

Notísia relevante:  Don Virgílio do Carmo marka istória Uma Kreda Timor-Leste

Don Virgílio  moris iha loron 27 novembru 1967, iha Venilale, Timor-Leste, hala’o ninia estudu dahuluk iha eskola primária to’o sekundária iha eskola saleziana iha Fatumaca, hafoin nia kontinua ninia formasaun iha kongregasaun saleziana no halo ninia profisaun dahuluk iha loron 31 Maiu 1990 iha Komunidade Saleziana Fatumaca. 

Halo ninia profisaun dahuluk, Mons. Virgílio hala’o ninia estudu filozófiku no teolójiku iha Manila, Filipina no durante ninia estudu iha Filipina, Mons. Virgílio halo ninia profisaun perpétua iha loron 19 marsu 1997. 

Nia simu ordenasaun prezbiterál iha loron 18 dezembru 1998 iha Santuário Nacional de Maria Auxiliadora dos Cristãos Parañaque, Filipina, hafoin ramata ninia estudu teolójiku nian iha Don Bosco School of Theology (BDST) ne’ebé uluk hanaran Don Bosco Center of studies (DBCS).

Hosi tinan 1999 to’o 2002, nia tau-matan ba aspirante sira iha Fatumaca, hafoin muda ba Venilale hodi tau-matan ba pre-spirante sira-nia ho hala’o mós knaar nu’udar administradór komunidade nian.

Hosi 2005-2007, Mons. Virgílio continua filafali ninia estudu sira iha área espiritualidade nian iha Universidade Pontifícia Salesiana (UPS), Roma. Hafoin filafali mai Timór, hosi tinan 200 to’o 2014, Mons. Virgílio hala’o ninia knaar iha Komunidade Saleziana Fatumaca nu’udar Mestre dos Noviços.

Hosi tinan 2009-2014, Kardeál dezignadu hala’o mós ninia knaar nu’udar Diretór Komunidade Saleziana Fatumaca. Iha tinan 2015, Reitór-Mór Salezianu sira-nian Don Ángel Fernández Artime, SDB hili Mons. Virgílio sai Provinsiál ba Vise-Provínsia ITM (Indonesia-Timór) nian. 

Iha loron 30 janeiru 2016, Mons. Virgílio hetan nomeasaun hosi Papa Francisco hodi sai Bispu Dioseze Dili nian no iha setembru 2019 foti nia sai Arsebispu dahuluk ba Arkedioseze Metropolitana Dili nian. 

Hafoin, iha loron 29 maiu 2022, iha konkluzaun Regina Coeli nian, Papa Francisco fó sai naran hirak-ne’ebé atu hola parte iha Koléjiu Kardeál sira-nian hamutuk na’in-21 no entre sira ida mak Mons. Virgílio do Carmo da Silva, SDB.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here