Vise Ministru Turismu Komérsiu no Indústria Domingos Lopes Antunes. Imajen Tatoli/Francisco Sony

DILI, 07 juñu 2022 (TATOLI)—Ministériu Turizmu Komérsiu no Indústria (MTKI) ho ekipa Diresaun Nasionál Apoiu Dezenvolvimentu Mikro Pekuena no Média Empreza (DNAMPME), hosi Diresaun Jerál Indústria, halo sosializasaun programa fasilidade garantia kréditu suave ba komunidade iha postu administrativu Maliana, munisípiu Bobonaro.

Vise-Ministru Komérsiu no Indústria, Domingos Lopes Antunes, hateten, programa kréditu suave ka kréditu funan kiik ne’e rasik realiza liuhosi serbisu hamutuk entre Ministériu Turizmu Komérsiu no Indústria (MTKI), Programa Nasaun Unida ba Dezenvolvimentu (UNDP), Banku Nasionál Komérsiu Timor-Leste (BNCTL, sigla portugés), no Institutu Apoiu Dezenvolvimentu Emprezariál (IADE) oinsá fó kréditu funan kiik ba empreza ka joven sira ne’ebé hakarak halo negósiu ruma.

“Kréditu suave ne’e ho juru 3% kada tinan, nune’e ita halo sosializasaun ba programa ne’e atu apoiu setór privadu sira, liuliu Mikro Pekena média Empreza Sosiál atu asesu ba kréditu funan kiik hodi dezenvolve kadeia valór prominente sira iha setór produtivu hanesan turizmu, indústria, agrikultura, peska komérsiu no sira seluk,” Vise-Ministru hateten liuhosi nota ne’ebé Agência Tatoli asesu, tersa ne’e.

Notísia relevante: MTKI-BNCTL asina akordu ho benefisiáriu garantia kréditu sosiál

Nia dehan, bainhira setór privadu dezenvolve ona iha área turizmu, indústria, agrikultura no seluk tan, atu diversifika Timor-Leste nia ekonomia la’ós de’it ona petrolífera, atu nune’e kria empregu no rendimentu iha área rurál.

Programa ne’e mós hanesan medida longu prazu, ne’ebé Governu prevee ona milliaun $50 hodi fó biban mós ba empreza boot sira iha Bobonaro atu aseseu ba kréditu bele hahú hosi $1.000 to’o $25.000.

“Ha’u husu ba Emprezáriu sira atu prepara planu negósiu di’ak hodi asesu ba kréditu suave ho funan kiik 3%, bainhira ita halo empréstimu ita la selu iha períodu  grasa másimu fulan-neen,” nia dehan.

Programa ne’e rasik Governu Programa Nasaun Unida ba Dezenvolvimentu (PNUD) disponibiliza fundu hamutuk $1.380.330 hodi implementa programa kréditu suave.

“Ita bolu kréditu suave tanba nia funan ne’e kiik liu, kompara ho kréditu seluk ho funan boot. Programa ne’e iha vantajen di’ak ba empreza ne’ebé asesu tanba benefisiáriu la selu 3% iha períodu grasa hosi fulan-tolu to’o neen,” governante ne’e informa.

Durasaun kréditu hahú hosi tinan ida to’o tolu iha BNCTL no empreza bele asesu kréditu hahú hosi $1.000 to’o $25.000.

“Ida-ne’e sei hadi’a ita-nia moris no ita la tane liman ba ema, ba futuru ami komprometidu programa ne’e sei kontinua nafatin no tinan ne’e loke tan hodi ita tau osan hamutuk millaun $5, nune’e joven sira ne’ebé dedika-an halo négosiu ba mikro, pekena no médiu empreza bele asesu ba programa ne’e,” nia salienta.

Kritériu atu sai benefisiáriu ba programa maka tenke rejistradu hanesan entidade formál ida iha Servisu Rejistrasaun no Verifikasaun Emprezariál Instututu Públiku (SERVE) no tenke iha planu negósiu, iha kartaun eleitorál, billete identidade no seluk tan.

Komisaun responsável ba programa fasilidade garantia kréditu suave no sei halo avaliasaun no verifikasaun prosesu asesu kréditu mak MTKI, BNCTL, Kámara Komérsiu Indústria Timor-Leste (CCI-TL, sigla portugés) no IADE.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here