Ministériu Saúde ho Ministériu Asuntu Kombatente Libertasaun Nasionál hala’o konsulta medika espesializada ba veteranu no antigu kombatente libertasaun Nasionál na'in-102 iha  munisipiu Aileu. Imajen/Espesial 

DILI, 06 Juñu 2022 (TATOLI)—Ministériu Saúde liuhusi Diresaun Nasionál Apoiu Servisu Ospitalar kolabora ho Ministériu Asuntu Kombatente Libertasaun Nasionál hala’o konsulta medika espesializada ba veteranu no antigu kombatente libertasaun Nasionál na’in-102 iha  munisipiu Aileu. 

Atividade outreach medika espesializada ne’ebé organiza husi Departamentu Apoiu no Koordenasaun Servisu Espesializadu (DNASH), hamutuk ho Mediku Espesialistaa husi  Hospitál Nasionál Guido Valadares (HNGV) iha Munisípiu Aileu ho objetivu atu dignifika veteranu sira-nia sakrifisiu, garante atendimentu saúde Veteranu no Antigus Kombatentes Libertasaun Nasionál.

“Problema saúde ne’ebé mak mediku espesialista sira deteta durante hala’o konsulta ba veteranu hamutuk na’in-102 mak hanesan, moras tensaun aas, moras obstrusaun pulmaun kroniku hanesan asma bronkiál, tuberkuloze ativu,” Xefe Departamentu Apoiu no Koordenasaun Servisus Espesializadu iha Ministériu Saúde,  Nilton da Costa Cruz,  hateten liuhsi nota ne’ebé TATOLI asesu, segunda ne’e. 

Alende ne’e, iha konsulta espesializada ne’e deteta mos moras Acute Back Pain, gastritis ka moras estomug, moras tilun ka kapasidade auditivu menus, infesaun iha tilun no garganta, problema matan hanesan haree dook ka besik la moos ka problema vizual no katarata, problema ruin inklui mós bala musan ne’ebé iha veteranu nia ain tuur, Lipoma, moras kulit sira hanesan tinea korporis, tinea pedis, tinea inguinal, ptiriasis versikolor, dermatitis atopika, urtikaria, onicomikosis, scabies, nomos pruritus ka urtikaria tanba alerjia ba hahan.

Iha atividade ne’e, ba pasiente sira ne’ebé mak iha problema haree dook ka besik la moos, ekipa halo kedas intervensaun hodi fahe oklu gratuita, nune’e mós ba sira ne’ebé ho problema ruin ka isin no kotuk moras simu kedas tratamentu ho fisioterapia.

Ba moras sira ne’ebé ekipa deteta maibé labele hala’o intervensaun hanesan katarata, extrae ka hasai bala musan no operasaun ba lipoma, inklui ba moras fuan sira seluk, ekipa koordena hamutuk ho Servisu Saúde Munisipál Aileu, Klinika Saúde Veteranu no CACLN Munisípiu Aileu halo kedas transferensia  mai HNGV  na’in-15 atu nune’e bele hetan atendimentu diak liutan  nomós transfere ba rai liur karik iha duni nesesidade.

Iha atividade refere hala’o iha Sentru Saúde Internamentu Aileu Vila, hodi fó prestasaun kuidadu saúde sekundariu husi mediku espesialista husi Internista,Kardiolojista, Ortopedista, Otorrinolarongojista, Oftamolojista, inklui Dermatolojista Fisioterapista.

Tuir planu atividade hanesan iha tempu badak sei expande ka habelar liutan ba munisípiu sira seluk iha territóriu, hodi lori saúde no fó atendimentu kuidadu saúde sekundariu ba Veteranu no Antigu Kombantente Libertasaun Nasionál sira hotu.

Notísia relevante: MS-MAKLN fó tratamentu saúde ba veteranu na’in-199 iha Liquiça 

Jornalista: Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here