Progresu perfurasaun sistema bee-moos iha Oésilo atinje ona 100%. Imajen espesiál.

OÉ-CUSSE, 07 maiu 2022 (TATOLI) – Xefe Departamentu Servisu Água no Saneamentu (SAS) iha Rejiaun Administrativa Espesiál Oé-Cusse Ambeno (RAEOA), Julmira da Silva, informa, projetu konstrusaun ba perfurasaun sistema bee-moos ne’ebé konstrui iha mota Noel-Ekat, suku Bobometu, sub-rejiaun Oésilo, daudaun ne’e progresu atinje 100%.

“Projetu perfurasaun bee-moos iha Noel-Ekat, Oésilo agora daudaun empreza konklui ona, atinje 100%, ne’ebé tuir ita-nia planu iha fulan-juñu ne’e, empreza sei entrega ba autoridade atu halo inaugurasaun, nune’e komunidade sira bele uza ona ba nesesidade loron-loron nian,” Julmira da Silva, informa ba Agência Tatoli iha Oé-Cusse, tersa ne’e.

Nia informa, projetu perfurasaun sistema bee-moos ne’e konstrui ho fazeadamente, faze dahuluk parte SAS trasa estratéjia, nune’e iha prosesu implementasaun hosi 2020 to’o tinan ne’e hanesan faze inísiu ba perfurasaun, instala kedas tanke rezervatóriu rua, ba prosesu distribuisaun.

“Entaun ita iha ona planu ba 2023, ita sei instala tán tanke transmisaun hosi tanke primeiru ba tanke segundu nian, nune’e ita bele distribui ba komunidade-sira iha aldeia Saben no Usapikolen,” nia afirma.

Jestór sub-rejiaun Oésilo, Domingos Marques, orgullu tanba autoridade konstrui ona fasilidade bee-moos atu fó tulun komunidade sira iha aldeia Saben no Usapikolen.

“Tuir ha’u-nia observasaun obra ne’e, sei fó duni benefísiu komunidade sira, tanba iha aldeia rua iha suku Bobometo ne’e presiza duni bee-moos, ne’ebé ha’u hanesan autoridade másimu iha sub-rejiaun Oésilo agradese ba autoridade RAEOA tanbe bele fasilita ona komunidade sira hodi konstru projetu perfurasaun ne’e,” nia orgullu.

Projetu perfurasaun sistema bee-moos ne’e parte SAS koko ona nia deditu kualidade bee atinje 21,82 litru/segundu.

Entretantu, projetu perfurasaun sistema bee-moos ne’e ezekuta hosi empreza Mira Mar Unipesoál, Lda, ho valór kontratu $516,861.66 ne’ebé autoridade RAEOA prevee hosi Orsamentu Jerál Estadu (OJE) 2020 nian.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here