Prezidente Parlamentu Nasionál (PPN), Aniceto Longuinhos Guterres Lopes. Imajen TATOLI/Francisco Sony.

DILI, 07 juñu 2022 (TATOLI)—Meza plenária Parlamentu Nasionál liuhosi reuniaun plenária, tersa ne’e, anunsiu admisaun baixa ba komisaun B trata asuntu Negósiu Estranjeiru no Defeza no Seguransa hodi fó paresér ba ratifika tratadu proibisaun totál ensaiu nuklear no respetivu anexu, adotadu hosi rezolusaun assembleia jerál Nasaun Unida númeru 50/245.

Notísia Relevante: Governu aprova proposta rezolusaun PN ratifika adezaun ba tratadu proibisaun nukleár

Meza mós baixa ba komisaun B no Komisaun C trata asuntu Finansa Públika ba proposta rezolusaun númeru 14/V/ (4a)-aprova konvensaun entre Repúblika Portugéza ho Repúblika Demokrátika Timor-Leste evita dupla tributasaun no prevene evazaun fiskál iha matéria impostu kona-ba rendimentu ne’ebé asina iha Lisboa 27 setembru 2011.

“Nune’e meza plenária baixa ona,” Prezidente Parlamentu Nasionál, Aniceto Longuinhos Guterres Lopes, fó sai iha sala plenária

Enkuantu, substansia detallu kona-ba tratadu no konvensaun refere komisaun espesializada sira sei fó relatóriu paresér hafoin sei aprezenta iha plenária hodi kontinua diskusaun tuir mai.

Antes ne’e, iha sesta (13 maiu 2022), Governu liuhosi reuniuan Konsellu Ministru (KM) estraordinária, aprova projetu ba proposta rezolusaun Parlamentu Nasionál (PN) ba ratifikasaun adezaun Timor-Leste ba tratadu kona-ba proibisaun totál ensaiu nukleár, ne’ebé aprezenta hosi Ministra Negósiu Estranjeiru no Kooperasaun, Adaljiza Albertina Xavier Magno.

Tratadu ne’e atu bandu totál ensaiu nukleár (teste nukleár) ba objetivu militár, hanesan forma hodi limita dezenvolvimentu hosi arma nukleár ne’ebé daudaun ne’e iha no aparesimentu hosi tipu arma nukleár foun sira, hanesan medida efikás dezarmamentu nukleár no la proliferasaun arma nukleár sira.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here