Prezidente IPG, Gabriel Gaspar Apaício de Oliveira, entrega hela relatóriu peskiza risku jeolójiku no mapa ba Administradór munisípiu Viqueque, Januário Soares, tersa (07/06). Imajen Tatoli/Antónia Gusmão

VIQUEQUE, 07 juñu 2022 (TATOLI)–Institutu Petróleu no Jeolojia (IPG, sigla portugés) rekomenda ba Governu liuliu Sekretaria Estadu Protesaun Sivil (SEPS) atu monta sistema alerta sedu iha fatin risku munisípiu Viqueque, nune’e bele evita risku inundasaun.

“Inundasaun liga ba bee, enkuantu bee bele lori ita ba buat di’ak bele mós lori ba dezastre, bee laiha ita bele lakon iis maibé bee iha mós bele lori ita lakon. Rekomendasaun ne’ebé sujere bazeia ba estudu, karik halo infraestrutura ida tenki halo estudu detallu área jeolojia, téknika, no dezeñu. Dala ruma dezeñu di’ak maibé iha kampu bele implementa oin seluk no labele soe lisu iha mota-laran, evita konstrui uma iha mota ninin. Tanba ne’e, husu atu instala sistema alerta sedu iha Viqueque, investimentu sistema ne’e boot maibé presiza asegura ema,” Peskizadór IPG, Luís Teofilo da Costa, hateten liuhosi aprezentasaun kona-ba risku inundasaun, iha salaun administrasaun munisípiu Viqueque, tersa ne’e.

Notísia relevante: Autoridade Viqueque utiliza rezultadu peskiza IPG hodi hamenus impaktu dezastre naturál

Antes ne’e, IPG halo peskiza risku inundasaun iha juñu no ramata iha outubru 2021 iha munisípiu Viqueque, ne’ebé hosi estudu ne’e hetan tipu inundasaun bee sa’e iha rua hanesan bee halai iha rai leten de’it no mota sa’e.

“Estudu ne’e ho objetivu halo validasaun dadus ne’ebé IPG kria antes ona ho ninia mapa poténsia, katak área ne’ebé bele hetan perigu no risku ba bee-sa’e, aleinde ne’e atu fornese mós mapa ida ba munisípiu kona-ba perigu inundasaun, nune’e bele fó rekomendasaun ba autoridade munisipál no komunitária,” Luís akresenta.

Estudu kona-ba dadus hanesan replikasaun área ne’ebé halo observasaun bee-sa’e, sukat mota nia luan, no foti imajen, sai hanesan istória katak tinan-oin sei sai oinsá kompara ho antes. Alende ne’e, presiza haree nia morfolojia topograsia, área bee sulin no ikus liu mak idrolojia, karik udan laiha bee sei la sa’e.

“Hafoin analiza dadus sira maka hetan rezultadu sai mapa no relatóriu. Estudu ne’e halo atu minimiza nia risku, ezemplu iha postu Ossu bele hela maibé iha fatin seguru, rai balun ne’ebé la halai ne’e ema-nia rain,” nia tenik.

Peskizadór ne’e dehan, estudu ne’e la’ós atu hatauk populasaun maibé fó hanoin atu apár ho natureza ho hanoin ida ladun ona fó ameasa boot liu.

Inundasaun kauza hosi atividade umanu no naturál ne’ebé deskontroladu, liuhosi atividade umanu hanesan tesi ai arbiru no soe lixu iha mota nia dalan, ne’ebé fó risku bee intupidu no bee halai fali mai rai maran.

“Kondisaun ne’e barak akontese iha Dili no Viqueque mós akontese hanesan iha Welolo nian, tanba ai sira taka hotu bee dalan, entaun mota buka fali dalan seluk. Mota Betuku liga ba Bikaren, sedimentasaun iha área Bikaren ne’e nakonu hanesan morru protesaun, uluk a’as maibé agora badak,” nia esplika.

Área hirak ne’ebé perigu liu ba bee-sa’e maka iha suku Uma-boot, Luka, Bibileo, parte súl nian iha suku Watudere, Aliambata, iha área Aibubu, Irabui-leten. Zona moderadu ka iha posibilidade bee bele sa’e mak hanesan área besik mota nian, liliu Uma-tolu, Bibileo, Uamori, Uma-kiik, Maluru, Watudere, Umauain Leten, Makadiki, Matahoi, Weitame, Wesoru, la’ós hotu maibé parte balun de’it, enkuantu parte foho maioria tama ba zona badak katak ladún iha ameasa ba inundasaun.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here