Ekipa IPG rekolla materiál amostra hafoin akontese fenómenu naturál foin lalais, iha área área Raisut-Raitahu, suku Uma uain-kraik, munisípiu Viqueque. Imajen/IPG

VIQUEQUE, 07 juñu 2022 (TATOLI)–Institutu Petróleu no Jeolojia (IPG, sigla portugés) hala’o peskiza iha munisípiu Viqueque iha tinan 2021, ne’ebé hosi peskiza ne’e hatudu rezultadu rejiaun ne’e poténsia ba dezastre naturál.

“Hosi estudu ne’e konklui katak munisípiu Viqueque risku tebes ba dezastre naturál ne’ebé halai liu ba erozaun kosteira no rai-halai, kauza sira ne’e hosi fatór jeolojia, jeomorfolojia, karaterístika meterolojia mak hanesan udan-been no anin boot,” Peskizadór IPG, Feliz Jones Guterres, hateten liuhosi aprezentasaun rezultadu peskiza kona-ba risku rai-halai no erozaun kosteira iha Viqueque iha salaun administrasaun Viqueque, tersa ne’e.

Viqueque akontese rai-halai maka’as tebes tanba kalkáriu iha foho leten a’as, entaun iha okos domina ho tahu manu-teen, ne’ebé bainhira udan boot tun nota katak tahu manu-teen hanesan namdoras no loke-an neneik, entaun fatuk todan tuun nune’e kuaze maioria fatin sira domina ho kalkáriu iha tahu manu-teen nia leten entaun domina ho rai halai.

Notísia relevante: Autoridade Viqueque utiliza rezultadu peskiza IPG hodi hamenus impaktu dezastre naturál

Tanba ne’e, institutu rekomenda uza ai-horis ne’ebé fó benefísiu ba ekonomia hanesan bele kuda kami, bua, no nuu atubele garantia fali estabilidade rai ne’e rasik.

Peskizadór IPG ne’e dehan, kondisaun morfolojia Timor-Leste maioria domina ho foho, iha mós área tetuk ne’ebé maioria populasaun sira hela iha ne’ebá, bazeia ba preferénsia sira iha tinan 2015, maibé Timor-Leste vulnerável tebes iha dezastre naturál hanesan rai-halai, bee-sa’e, anin boot, rai nakdoko no tsunami.

“Dezastre hirak ne’e fó impaktu ba territóriu nasaun, entaun dezastre hirak ne’e presiza evalua tuir padraun ne’ebé iha ona. Entaun durante ami halo observasaun jerál, hafoin identifikasaun rai-halai no erozaun kosteira iha munisípiu Viqueque,” nia akresenta.

Iha fatór barak mak halo rai-halai no erozaun kosteira, fatór prinsipál maka rai nakdoko, fatór jeolojia, ne’ebé haree liubá estrutura fatuk, rai mai ho udan-been oinsá haree ba inklinasaun foho ne’e rasik hodi provoka ba rai ne’e halai inklui intervensaun umanu.

Intervensaun umanu ne’e dala barak sai fatór ne’ebé provoka dezastre sira, kona-ba erozaun kosteira iha fatór rua, kompostu hosi fatór naturál hanesan anin no korrente ne’ebé iha tasi-ibun, anin boot akompaña no udan.

“Atividade umanu ezemplu maioria iha Dili ema gosta kee tiha foho lolon depois halo uma, ida-ne’e sai hanesan fatór ida hanesan tesi ai no movimentasaun transporte sira sai hanesan mós fatór ida,” nia tenik.

Nune’e, rai halai hanesan prosesu jeolojia deslokamentu hosi fatin orijen mai fatin ne’ebé mak tetuk, entaun deslokasaun hosi foho leten ho nia orijin hodi mai para iha fatin ne’ebé mak tetuk, tipu rai halai iha munisípiu Viqueque akontese iha postu administrativu Ossu domina ho tipu rai halai rua translasionál no fatuk monu.

“Entretantu, risku erozaun kosteira nia a’as liu domina iha parte hosi Uaitame to’o Irabere, entaun risku ne’ebé moderadu iha Beaço to’o Uatulari, risku baixu hosi Dilor to’o Viqueque vila, risku baixu tanba iha ne’ebá populasaun ladun hela besik iha tasi, entaun ami la konsege asesu to’o ne’ebá tanba dalan laiha entaun labele foti dadus,” nia realsa.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here