Ahi han motuk uma ida iha suku Ogues, postu administrative Maucatar, munisípiu Covalima. Imajen Tatoli/Celestina Teles.

COVALIMA, 07 juñu 2022 (TATOLI)–Tanba kauza hosi sirkuitu fiu eletrisidade, ahi konsege han uma ida aldeia Ogues, suku Ogues, postu administrativu Maucatar, munisípiu covalima, iha domingo (5/6) tuku 22h00 kalan.

Iha inséndiu ne’e, uma na’in ka vítima la konsege salva ninia sasán iha uma laran tanba la konsege salva hodi ahi-nia nanál me’an be lakan sa’e no han mutuk tiha uma ne’e.

Vítima inséndiu, Cipriano do Carmo. Imajen Tatoli/Celestina Teles.

“Ha’u-nia sasán uma laran ahi-han mutuk hotu tanba kauza sirkuitu hosi eletrisidade   dada fiu metan ba uma laran. Ha’u-nia oan feto mak hetan uluk ahi han fiu metan no nia sente manas, entaun ha’u-nia oan feto mai fanu ami no ami sai ho roupa iha isin-lolon de’it hodi salva an,” Vítima Cipriano do Carmo informa ba jornalista sira, iha fatin akontesimentu, tersa ne’e.

Ho akontesimentu ne’e, vítima la konsege salva sasán iha uma laran mak hanesan dokumentu famíli inklui diploma labarik sira-nian, roupa, armari, televizaun ne’ebé ahi han mutuk hotu.

Hafoin akontesimentu ahi han uma, Protersaun Sivil Covalima , CVTL  no  Word Vision ho ekipa  fó   apoiu emerjénsia hanesan ai-han ho non ai-han  ba vítima inséndiu refere.

Aleinde mós administradór munisípiu Covalima tun ba terreñu hodi fó apoiu foos ba saku 10, liu-liu vítima Cipriano do Carmo ho nia família no hetan apoiu mós viziñu no família hosi Cipriano do Carmo ho nia kaben Santina Cardoso hodi simu materiál rekuperasaun konstrusaun uma.

Maske hetan ona apoiu emerjénsia maibé vítima mós husu ba Governu atu kontinua apoiu materiál konstrusaun uma, hodi nune’e bele konstrui hikas uma.

Hafoin akontesimentu inséndiu ne’e, Xefi Suku Faustinu Cardoso informa ba bombeiru hodi halo intervensaun maibé la konsege salva, ho nune’e nia parte mós relata kedas relatóriu ba Protesaun Sivil, parseiru Cruz Vermelha Timor-Leste (CVTL), Word Vision ne’ebé fó kedas apoiu emerjénsia ba vítima inséndiu.

“Ha’u relata relatóriu ba protesaun sivil, CVTL no world vision ne’ebé fó kedas apoiu emerjénsia, aleinde ne’e ita-nia administradór Munisípiu Covalima rasik mós fó apoiu emerjénsia fós saku 10,” nia dehan.

Ho nune’e, ekipa hosi Dirasaun Jestaun Risku Dezastre Naturál halo verfikasaun dadus inséndiu hodi haruka ba iha nasionál, nune’e apoiu materiál rekuperasaun hosi konstrui uma ba vítima inséndiu sira.

Antes ne’e, iha loron 31 maiu, Diretór Servisu Munisipál Protesaun Sivil, Jestaun Dezastre Naturál Covalima, Quintino da Costa fó sai dadus katak hahú fulan janeiru to’o maiu ne’e rejista uma-kain 42 iha Covalima sai vítima ba dezastre Naturál.

Notísia Relevante: Janeiru-maiu: Covalima rejista vítima dezastre naturál 42

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here