Diretór Jerál Desentralizasaun Admistrativa hosi Ministériu Administrasaun Estatal, Belarmino Filomeno Neves. Imajen Tatoli/Natalino Belo.

BAUCAU, 07 juñu 2022 (TATOLI) – Governu liuhosi Ministériu Administrasaun Estatál (MAE) hakarak transforma munisípiu hotu adota administrasaun indireita iha 2023 nune’e iha autonomia administrativa, finanseira no patrimoniál.

“Iha 2023 ita hakarak transforma munisípiu hotu ba ona adota administrasaun indireita estadu katak sira iha ona administrasaun ida-ne’ebé autónomu,” Diretór Jerál Desentralizasaun Administrativa hosi Ministériu Administrasaun Estatál, Belarmino Filomeno Neves, hateten iha Vila Nova, Baucau, tersa ne’e.

Notísia relevante: PN aprova projetu Lei Eleitorál Munisipál-Podér Lokál iha finál globál

Nune’e nia husu joven sira no entidade hotu iha kada munisípiu atu partisipa no kontribui iha prosesu implementasaun lei podér lokál no desentralizasaun administrativa.

Governu liuhosi Ministériu Administrasaun Estatál hahú prepara polítika ba desentralizasaun administrativa dezde tinan-2016, bazea ba kriasaun dekretu-lei númeru 3/2016 ne’ebé fahe ba faze tolu hanesan deskonsentrasaun administrasaun territoriál katak kompeténsia serbisu entrega ba munisípiu maibé nafatin responsável hosi nasionál.

Faze daruak mak desentralizasaun administrativa institusionál katak munisípiu sira hahú iha ona administrasaun autonomia finanseira, patrimoniál, organizativa no administrativa ka sei la simu tán orden maibé sei nafatin superviziona no kontrola hosi Governu Sentrál.

Atu kumpri faze daruak desentralizasaun administrativa presiza liuhosi avaliasaun tuir dekretu-lei númeru 3/2016 katak sei halo avaliasaun ba kondisaun ezisténsia tuir delegasaun kompeténsia ne’ebé fó ona dezde 2016.

Faze datoluk mak desentralizasaun administrativa territoriál ne’ebé totalmente kumpri mandatu konstitusionál ne’ebé prevista iha Konstituisaun Repúblika Demokrátika Timor-Leste, artigu 72 kona-ba podér lokál liuhosi eleisaun munisipál ne’ebé sei hili órgaun reprezentativu rua hanesan prezidente, vise prezidente autoridade munisipál no membru asembleia munisipál.

Atu to’o iha faze datoluk ne’e presiza iha enkuadramentu ka pakote lei tolu hanesan; lei podér lokál no desentralizasaun administrativa, eleitorál munisipál no lei finansa munisipál.

“Ita hein katak molok tinan ne’e remata lei finansa munisipál ne’e bele aprova no promulga hosi Prezidente Republika,” Belarmino argumenta.

Desentralizasaun administrativa nu’udar mandatu konstitusionál ne’ebé prevista iha Konstituisaun RDTL artigu 5 kona-ba desentralizasaun, katak Estadu respeita prinsípiu desentralizasaun ba administrasaun públika, ne’ebé hakbesik serbisu ba komunidade tuir artigu 137 prinsípiu jerál kona-ba administrasaun públika alínea daruak ne’ebé hateten administrasaun Timor-Leste iha dalan atu hasees-aan hosi sistema burokrasia ne’ebé demais liu hodi hakbesik serbisu ba povu.

Belarmino husu ba entidade hotu liuliu juventude sira kontribui másimu ba prosesu tomak desentralizasaun administrasaun to’o establesementu podér lokál.

Notísia relevante: Baucau preparadu ezekuta lei podér lokál no desentralizasaun administrativa

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here