Ministru Agrikultura no Peska hamutuk ho adjunta Xefe Kaza Sivil Prezidente Repúblika entrega mákina dulas hare ba grupu agrikultura iha Zumalai. Imajen Tatoli/Celestina Teles.

COVALIMA, 07 juñu 2022 (TATOLI)—Governu liuhosi Ministériu Agrikultura no Peska, Pedro Reis, hamutuk ho adjunta Xefe Kaxa Sivil Prezidénsia Repúblika distribui mákina dulas hare ba grupu agrikultura 10 iha postu administrativu Zumalai, munisípiu Covalima.

“Ha’u husu ba grupu sira tenke kuidadu mákina sira-ne’ebé MAP ho parseiru oferese tenke kuidadu mákina no uza ho didi’ak maske fó apoiu ba grupu 10, maibé atu fasilita mós grupu sira seluk,” Pedro Reis hateten hafoin entrega mákina dulas hare ba grupu sira, iha aldeia Beilaco, suku Raimea, postu administrativu Zumalai, munisípiu Covalima, segunda ne’e.

Governu hamutuk ho parseiru sei haree ba futuru atu aumenta tan maibé tenke prosesu la’o neineik, maibé mákina ne’ebé Governu hamutuk ho parseiru oferese ne’e tenke kuidadu.

“Iha posibilidade atu aumenta ba futuru importante tenke kuidadu. Ita haree rezultadu ho aproximasaun hosi Governu bele fó tulun tenke ho kuidadu,” governante ne’e hateten.

Tanba ne’e, nia mós hato’o parabéns ba grupu agrikultór sira-ne’ebé simu mákina tenke uza ho didi’ak no hatudu ho nia rezultadu.

Ofisiál Projetu Programa Hasa’e Produtividade Agríkultura Sustenvel (HAPAS/SAPIP) Covalima, Leonito da Silva, hateten durante ne’e projetu hasa’e produtividade agrikultura sustentavél (HAPAS) apoiu fundu no mákina ba grupu agrikultura sira.

“Ita apoiu ona hand tractor (HT) haat (4) ba grupu rua, mákina dulas hare ohin ita entrega hamutuk 17 ba iha grupu 10 ho nia orsamentu $17,425 hodi sosa mákina dulas hare 17 no ekipamentu seluk hodi fasilita grupu agrikultura,” nia informa.

Durante ne’e HAPAS estebelese ona grupu agrikultura hamutuk 26 no hosi númeru ne’e grupu agrikultura 16 mak hetan ona apoiu fundu hosi SAPIP.

Grupo 26 ne’ebé liuhosi projetu SAPIP estabelese iha suku Raimea, postu administrativu Zumalai ne’e sira halo atividade iha área sira kona-ba pekuarai, hortikultura, floresta no agrikultura.

Enkuantu grupu agrikultura ne’ebé mak simu mákina dulas hare ne’e mak hanesan grupu agrilkultura Moris Foun B, Ha’e-oan, Fuan Domin, WHO, Mota-ain, Ai-manas Viagou-halibur, Hadomi Agrikultura, Kalma no Beititir Buka Rasik.

Programa Hasa’e Produtividade Agríkultura Sustenvel (HAPAS/SAPIP) ne’e finansia hosi World Bank durante ne’e fó apoiu fundu ki’ik ba grupu agrikultura liuhosi Ministériu Agríkultura no Peska iha área Basias Hidrográfiku ho objetivu atu hadi’a ekonomía agrikultór iha nivel suku.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here