Ilustrasaun kampaña HIV/AIDS. Foto google

DILI, 07 juñu 2022 (TATOLI)—Prezidente Institutu Nasional Kombate HIV-SIDA, I.P, Antanasio de Jesus, hateten dadus moras HIV-SIDA iha Timor-Leste ne’ebé rejista liuhosi Ministériu Saúde ne’e hamutuk ema 1,582.

Hosi pasiente ema 1,582 ne’e, kuaze ema 260 mak mate no ema 800 ba leten sei halo tratamentu no iha ema 300 ba leten mak lakohi halo tratamentu.

“Agora virus HIV-SIDA ne’ebé fahe maka’as, mak sira-ne’ebé la halo tratamentu ne’e. Iha munisipiu sira hotu-hotu rejistu virus HIV-SIDA, maibé virus HIV-SIDA rejista aas mak munisipiu Dili, Bobonaro, Covalima, Baucau Inklui RAEOA. Munisipiu lima ne’e dadus kuaze ema 100 ba leten,” Prezidente INCSIDA, I.P ne’e hateten ba jornalista sira, hafoin disemina informasaun kona-ba HIV-SIDA ba estudante SOLS, iha Becora, tersa ne’e.

Tanba ne’e, Institutu Nasional Kombate HIV-SIDA, I.P servisu hamutuk ho AHHA Education (SOLS) realiza kampaña sensibilizasaun hodi disemina informasaun kona-ba prevensaun HIV-SIDA ba estudante sira iha SOLS Becora.

Maibé, ohin disemina informasaun ba alin estudante sira iha SOLS, sira la’ós grupu risku, maibé hanesan parte ida iha estratejia ba Institutu Nasionál Kombate HIV-SIDA IP nian.

“Agora desenvolve sira-nia an iha skill oioin, tenke konese no hatene di’ak kona-ba virus HIV-SIDA ninia lala’ok da’et ne’e, nune’e Institutu Nasionál Kombate HIV-SIDA, I.P mai partilla informasaun ba estudante no joven sira,” nia esplika.

Enkuantu atu prevene moras HIV-SIDA ne’e, primeiru tenke hatene nia koñesimentu, daruak sira tenke hadook an ransu livre no seksuál livre, datoluk labele ransu ho seksál livre no priobilistiva.

Priobilistiva bele utiliza kualker tempu nune’e virus labele kona, agora daudaun Institutu Nasional Kombate HIV-SIDA promove liu priobilistiva.

Tanba ne’e, virus ne’e tinan-tinan aumenta kuaze ema 200 ba leten no ema 200-300 impatadu hosi HIV-SIDA iha Timor-Leste.

“Entaun ita-nia nasaun ne’e kiik populasaun aumenta joventude halo aktividade aumenta, tanba ne’e tenke desemina informasaun ba joven sira,” nia esplika.

Estudante AHHA Education, Vanesia dos Reis, sente orgullu tebes hodi rona informasaun kona-ba moras HIV-SIDA ne’ebé hakbesik an mai sentru hodi fahe informasaun ne’ebé di’ak mai estudante no joven.

“Atu ami labele monu ba moras HIV-SIDA ne’ebe fasil da’et hosi relasaun seksuál ne’e mak labele halo relasaun seksuál arbiru iha fatin ne’ebé de’it,” nia dehan.

Estudante ne’ebe ohin partisipa ba sensibilizasaun informasaun no prevensaun moras HIV-SIDA IP hamutuk 753.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here