Ministru Ensinu Superior Siénsia no Kultura, Longuinhos dos Santos. Imajen Tatoli/Egas Cristóvão

DILI, 06 juñu 2022 (TATOLI)–Reitór Universidade Nasionál Timor-Lorosa’e (UNTL) propoin ba VIII Governu Konstitusionál atu iha tinan 2023 re-aloka osan millaun $1,116, ne’ebé Governu foti hodi hodi apoiu kalamidade iha loron 04 abril 2021.

“UNTL nia osan ko’a hodi apoiu dezastre naturál iha tinan 2021 no Governu rasik promete sei tau fali iha tinan 2022, maibé la konsege tau, tanba ne’e ami ezije Governu labele haluha ami-nia osan tenke re-aloka ona iha 2023,” Reitór UNTL, João Soares Martins, hateten iha Otél Novo Turismo, segunda ne’e.

Nune’e, Reitór ezije Governu tenke re-aloka fali osan millaun $1,116 mai fali orsamentu UNTL nian atu sira bele destina planu no programa kontinuasaun konstrusaun foun ba sala aula.

“Daudaun ne’e, UNTL iha ona edifísiu andár tolu ho sala aula hamutuk 36, maibé daudaun ne’e seidauk sufisiente atu responde nesesidade estudante sira-nian tanba fakuldade balun maka seidauk iha fasilidade adekuadu atu responde nesesidade. Tanba ne’e, sira ezije Governu tenke re-aloka osan hodi responde ezijénsia sira,” nia akresenta.

Notísia relevante: Governu halo esforsu rekupera estragu infraestrutura públiku impaktu hosi kalamidade

Nia dehan, orsamentu UNTL ne’ebé konsege ko’a ona hodi apoiu kalamidade iha tinan kotuk ne’e, konsege impedimentu prosesu balun ne’ebé UNTL atu halo, maibé UNTL iha solusaun hodi kontinua jere metade orsamentu ne’ebé iha atubele solusiona difikuldade sira.

Aleinde ne’e, Reitór UNTL hato’o ona asuntu ne’e ba Ministériu Ensinu Superior Siénsia no Kultura (MESSK) atu toma responsabilidade hodi reforsa ezijénsia ne’ebé iha.

UNTL prontu bainhira iha diskusaun Orsamentu Jerál Estadu (OJE), nia sei aprezenta mós preokupasaun sira ba Governu hodi toma responsabilidade.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here