Primeiru-Ministru, Taur Matan Ruak dada-lia ho Primeiru-Ministru Austrália, Anthony Norman Albanese via telefónika, domingu (05/06). Imajen/GPM

DILI, 06 juñu 2022 (TATOLI)-Primeiru-Ministru (PM), Taur Matan Ruak, iha domingu (05/06), dada-lia via telefónika ba dahuluk ho ninia omólogu foun Primeiru-Ministru Austrália, Anthony Norman Albanese, hodi fó hanoin ba malu kona-ba hametin kooperasaun bilaterál país rua, ne’ebé estabelese ona iha tinan 20 ikus.

“Lori povu Timor-Leste nia naran no ha’u-nia naran rasik, saúda no kongratula onorável Deputadu Anthony Albanese ba kargu Primeiru-Ministru, no reafirma kompromisu Governu Timor-Leste hodi kontinua hametin no hakle’an relasaun no kooperasaun bilaterál entre Dili no Canberra, tantu iha nível povu ba povu no Estadu ba Estadu,” PM Taur hateten liuhosi nota imprensa ne’ebé Agência Tatoli asesu, segunda ne’e.

Notísia relevante: Governu no empreza ASN selebra kontratu implementa projetu fibra ótika

Biban ne’e, Xefe Governu agradese ba apoiu australianu durante ne’e iha área hotu no espesialmente iha área krusiál no importante hanesan projetu Fibra Ótika no espansaun Aeroportu Internasionál Prezidente Nicolau Lobato.

PM Taur konsidera Austrália hanesan parseiru no belun di’ak Timor-Leste, ne’ebé hamriik iha povu Timor-Leste nia sorin dezde tinan 1999, 2006, no tinan 2020 to’o 2021 iha tempu pandemia COVID-19 no dezastre naturál.

Nune’e, Primeiru-Ministru Austrália, Anthony Albanese, agradese tebes ba ninia omólogu timor-oan, ba votu  saudasaun no parabéns, hodi reafirma mós kompromisu Governu foun Austrália atu kontinua serbisu hamutuk ho Governu Timor-Leste atuál hodi fó apoiu ba área sira hanesan mudansa klimátika, mobilidade laborál, seguransa regionál, Governu Eletrónika no dezenvolvimentu ekonómiku país nian.

Molok termina konversa, hosi konvite Primeiru-Ministru Albanese, Xefe Governu Timor-Leste  hatán no promete sei vizita Austrália molok mandatu termina, ne’ebé tuir loloos hala’o ona iha fevereiru tinan ne’e, maibé tanba pozitivu ho COVID-19, vizita refere tenke adia fali.

Ba resposta pozitivu ne’e, Xefe Governu australianu hein ho laran kontente vizita hosi Primeiru-Ministru.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here