Imajen/Media PR.

DILI, 06 maiu 2022 (TATOLI)—Parlamentu Nasionál (PN) liuhosi reuniaun plenária, segunda ne’e, ratifika akordu rua ho nasaun Kamboja no Tailandia ba ba izensaun vistu (bebas visa) ba titulár pasaporte diplomátiku no servisu.

Rezolsaun Parlamentu Nasionál númeru 11/V (4a)- aprova akordu entre Repúblika Demokrátika Timor-Leste no Reinu Kambodia ba izensaun vistu ba titulár pasaporte diplomátiku no servisu, no rezolusaun PN númeru 12/V (4a)- aprova akordu entre Governu Repúblika Demokrátika Timor-Leste no Reinu Tailandia ba izensaun vistu ba titulár pasaporte diplomátika no servisu.

“Rezultadu votasaun ba rezolusaun rua ne’e hanesan de’it a-favór 51 kontra 0 no abstensaun 0 nune’e aprovadu,” Prezidente Parlamentu Nasionál em-Exersisiu no Atuál Vise PN, Luís Roberto, deklara iha sala plenária.

Vise Ministru Negósiu Estranjeiru no Kooperasaun (MNEK), Julião da Silva, dehan iha tinan 2016 no 2017 Governu Timor-Leste asina ona akordu ho nasaun rua ne’e hafoin ne’e nasaun rua refere lori kedas ba sira-nia Parlamentu hodi ratifika no hein de’it Timor-Leste tanba ho situasaun polítika no pandemia COVID-19 tinan rua nia laran hodi adia prosesu refere no agora mak lori mai PN hodi halo ratifikasaun.

Governante ne’e hateten, ho akordu ne’e sei fasilita liután konetividade Timor-Leste ho nasaun rua ba izensaun vistu ba titulár pasaporte diplomátika no servisu inklui emprezáriu sira.

“Hanesan ita hatene Governu ita agora esforsu tebes adere ba ASEAN no mós organizasaun mundiál komérsiu, nune’e ho akordu ne’e oportunidade di’ak loos ba Timor-Leste hodi diversifika ita-nia ekonomia nomós halo konetividade fasil fasilita emprezáriu sira atu bele hasoru malu ho nasaun Tailandia no Kambodia nian,” nia hateten.

Nune’e, parte Governu agradese ba Parlamentu Nasionál bele ratifika ona akordu rua ne’e.

Deputadu Fretilin, Antonino Bianco, hateten Papél PN atu ratifika de’it no Governu atu iha prosesu implementasaun mak tenke fó diseminasaun ba parte rua ho didi’ak, nune’e iha implementasaun labele hetan obstakulu iha terrenu.

Jornalista : Nelson de Sousa

Editór     : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here