Prokuradór Jerál Repúblika, Alfonso Lopez. Imajen Tatoli/Antonio Daciparu

DILI, 06 juñu 2022 (TATOLI)— Prokuradór Jerál Repúblika Timor-Leste (PGR, sigla portugés) planu atu selebra akordu ho Kejaksaan Tinggi Nusa Tenggara Timur (NTT)-Indonézia, hodi hamutuk kombate krime aktu brankeamentu kapitál no finansiamentu terrorizmu ne’ebé ameasa transnasionál iha nasaun sira iha mundu.

“Ita sei hametin kooperasaun ho parte Kejaksaan Tinggi Nusa Tengara Timur (NTT)-Indonézia, iha área kombate krime transnasionál. Nune’e ita fó konvite espesiál ba Kejaksaan Tinggi hodi mai partisipa seremónia aniversáriu Ministériu Públiku nian ba dala-20 hanesan meiu ida atu aprosima sira atu hamutuk kombate krime transnasionál,” PGR ne’e hateten ba jornalista sira iha salaun MNEK, Prai-Kokeirus-Dili, segunda ne’e.

Notísia relevante:  Brankeamentu kapitál no finansiamentu terrorizmu sai ameasa transnasionál

PGR dehan presiza iha akordu internasionál atu kombate krime transnasionál tanba aktu sira ne’e fó risku rua, hanesan laiha estabilidade finanseira no risku ba reputasaun nasaun nian.

“Ita koalia kona-bá kombate korruppsaun, maibé akordu internasionál laiha, ita labele halo buat ida, kuandu ema ruma hakarak naok osan Estadu no halai uluk ba ona nasaun seluk ita la konsege asegura.  Ita konsidera krime transnasionál no krime ida ne’e bele mosu minutu deit,” nia dehan.

Nia hatutan: “Atu kombate  krime ida ne’e, presiza akordu internasionál,  tanba ne’e maka  ita konvida sira (Kejaksaan Tinggi Nusa Tengara Timur), atu haree posibilidade bele halo akordu ida atu kombate krime ida transnasionál”.

Iha fatin hanesan, Kepala Kejaksaan Tinggi Tengara Timur (NTT), Hutama Wisnu, agradese ba PGR ne’ebé konvida mai partisipa seremónia aniverariu PGR ba dala-20.

“Kona-bá estabelesimentu akordu kooperasaun krime transnasionál Timor-Leste ho Indonézia, parte rua seidauk konfirma ba malu, maibé iha nesesidade atu halo kooperasaun,” nia afirma.

Notísia relevante: MJ realiza semináriu prevene brankeamentu kapitál no finansiamentu terrorizmu

Atu kumpre padraun internasionál iha matéria prevensaun no kombate iha risku rua ne’e Timor-Leste adere ona ba grupu Ázia pasífiku ne’ebé hala’o nia knaar iha matéria prevensaun no kombate brankeamentu kapitál no finansiamentu terrorizmu.

Iha grupu Ázia Pasífiku nu’udar organizmu rejionál ida ba grupu asaun finanseiru ne’ebé estabelese no define ba prátika di’ak internasionál ba rekomendasaun 40 hodi bele implementa.

Daudaun ne’e, Banku Sentrál Timor-Leste (BCTL), estabelese ona akordu neen (6) iha nivel nasionál hanesan ho Prokuradoria Jerál Repúblika (PGR), Polísia Sientífika Investigasaun Kriminál (PCIC), Komisaun Funsaun Públika (CFP), Servisu Rejistrasaun no Verifikasaun  Emprezariál (SERVE), Ministériu Justisa no tempu badak sei estabelese mós akordu ho instituisaun seluk.

Intensaun hosi kooperasaun ne’e fó apoiu ba malu atu nune’e BCTL enrikesa prosesu analiza iha informasaun finanseira liga ba prátika internasionál sira ba kombate krime brankeamentu kapitál no finansiamentu terrorizmu.

Notísia relevante: Instituisaun tolu selebra akordu kombate krime brankeamentu kapitál-finansiamentu terrorizmu

Unidade Informasaun Finanseira (UIF) BCTL mós formaliza ona kooperasaun ho Unidade Informasaun Finanseira nível internasionál hamutuk 16 ho nia alvu mak permite troka informasaun no mós liuliu informasaun ne’ebé iha rezultadu analiza finanseira atu fasilita parte autoridade  prosesu investigasaun tantu iha rai-laran no rai-li’ur.

Timor-Leste mós hakarak kumpre padraun internasionál sira hodi adere ba rede internasionál ne’ebé koñesidu hanesan grupu Unidade Informasaun Finanseira Edmond nu’udar grupu halibur membru hotu iha mundu tomak.

Tuir lei númeru 17/2011 estabelese rekizitu jerál kona-ba prevensaun no kombate krime brankeamentu kapitál no finansiamentu terrorizmu hanesan forma ida hodi kumpre padraun internasionál sira.

Knaar UIF mak simu relatóriu tranzitóriu suspeita hosi instituisaun finanseira hodi halo analiza hafoin komunika rezultadu ba autoridade kompetente liu-liu Ministériu Públiku (MP) hodi fasilita liután investigasaun tuirmai.

Kona-ba finansiamentu terrorizmu mezmu dadus ne’ebé hatudu kona-ba prátika iha Timor-Leste tuir analiza risku la hatudu maka’as, maibé Estadu fó atensaun maka’as atubele halo prevensaun nafatin.

Notísia relavante: MJ ho BCTL asina MoU ba kombate krime brankamentu kapitál

Jornalista   : Natalino Costa

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here