Deputadu PD, Mariano Assanami Sabino. Imajen TATOLI/Egas Cristóvão

DILI, 06 maiu 2022 (TATOLI)—Deputadu Partidu Demokrátika (PD), Mariano Assanami Sabino, husu Governu liuhosi Ministéiru Saúde (MS) atu sériu apoiu klínika Bairru Pite tanba presta servisu saúde ba komunidade.

Notísia Relevante:PN aprova $258.110 apoia klínika Bairru Pite

Assanami hateten, Governu mai ho orsamentu por programa tan ne’e iha Orsamentu Jerál Estadu (OJE) 2022, Parlamentu Nasionál (PN) aprova rihun $258 ne’ebé mak aloka atu apoiu ba kliníka Bairru Pite.

“Orsamentu ne’ebé prevee importante tebes ba klínika Bairru Pite maibé faktu osan ne’e aloka de’it rihun $68 no rihun $190 aloka fali ba buat seluk, ida-ne’e perígu tebes tanba transferénsia públika ne’in atu ko’a. Tanba ne’e husu ba Governu direta ba Ministra Saúde atu haree katak iha seriedade para apoiu buka osan koloka fali ba ne’ebé atu sei iha karik mantein fó apoiu,” Deputadu PD ne’e hato’o liu hosi intervensaun polítika liuhosi plenária Parlamentu Nasionál, segunda ne’e.

Tanba to’o agora klínika Bairru Pite sei mantein fó asisténsia ba inan isin-rua, labarik, moras oioin ne’ebé mak durante ne’e hetan konfiansa hosi komunidade.

Klínika ne’ebé ema voluntáriu Amérikanu hodi fó nia vida tomak iha tempu rezisténsia, Doutór Daniel Murphy (matebian) mai hamutuk ho pesoál saúde balun halo servisu barak tebe-tebes hodi servi povu no rai ida-ne’e.

“Hanoin presiza sériu atu haree ida-ne’e tanba kuandu ita aprova halo transferénsia públika ne’in atu ko’a, tenke aloka duni satán Governu ho prinsípiu orsamentu por programa,” nia dehan.

Deputada CNRT, Fernanda Lay, sekunda katak Parlamentu Nasionál aprova ona orsamentu montante ida no ministériu hodi transfere montante seluk nune’e husu Tribunál Kámara  Konta hodi tau matán ba dezafiu ida refere lori ba ne’ebé aprova ona, se iha programa seluk re-distribui iha fatin seluk labele foti klínika Bairru Pite tanba istórikamente sira kontribui ba nasaun Timor-Leste.

Hatán ba kestaun ne’e, Governu liuhosi Ministru Asuntu Parlamentár no Komunikasaun Sosiál (MAPKOMS), Francisco Jerónimo,  rejista hela preokupasaun ne’e sei hato’o ba ministéiru tutela hodi fó resposta.

Jornalista : Nelson de Sousa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here