Ministériu Saúde no Organizasaun Mundiál Saúde hamutuk ho reprezentante profesora estudante no inan-aman sira halo lansamentu ba feira nasionál hodi selebra “Loron Mundiál ba Ai-han Seguru”. Iha Largo Lesudere Dili, segunda (06/06). Imajen Tatoli/Francisco Sony

DILI, 06 Juñu 2022 (TATOLI)— Relasiona ho komemorasaun loron mundiál ai-han seguru ne’ebé monu iha loron 7 juñu, Organizasaun Mundiál Saúde (OMS), husu ba Estadu Timor-Leste hodi tau atensaun makas ba ai-han saudavél no seguru.

Atu komemora loron mundiál ne’e, Ministériu Saúde ho Organizasaun Mundiál  Saúde iha Timor-Leste  loke feira durante loron rua  no  sei iha  kompetisaun tein hahán seguru, diskursu públiku kona-bá nutrisaun ka aihan saudavél ba ema hotu iha Largo Lecidere.

Reprezentante Organizasaun Mundiál Saúde (OMS) iha Timor-Leste, Arvind Mathur, koko produtu lokál ne’ebé prepara hosi estudante UNTL sira iha amibitu feira nasionál hodi selebra “Loron Mundiál ba Ai-han Seguru”. Iha Largo Lesudere Dili, segunda (06/06). Imajen Tatoli/Francisco Sony

Iha abertura feira ne’e, Reprezentante Organizasaun Mundiál Saúde iha Timor Leste, Arvind Mathur, hateten OMS kontinua bolu atensaun ba Timor-Leste no sidadaun sira hotu atu fó atensaun makas ba ai-han saudavél no seguru  hodi asegura ema hotu moris ho saúde di’ak.

“Iha Timor-Leste presiza servisu maka’as hodi garante ai-han saudavél no seguru ne’ebé ita konsumu. Ami kontinu hamutuk Ministériu Saúde atu promove no prátika hela xave lima ba ai-han seguru ba komunidade sira halo prátika atu moris ho saudavél liután,” Arvind Mathur hateten iha abertura feira, segunda ne’e.

Xave lima ba ai-han seguru mak prepara hahan ne’ebé mak moos, separasaun ba hahan tasak no matak, kondisaun saneamentu ne’ebé di’ak, bele rai hahan iha temperature ne’ebé mak tuir kritéria saúde nian ho temperature ne’ebé mak loos no utuliza bee ne’eb’e mak seguru no hili hahan ne’ebé mak fresku no hahan sira ne’e lalika liu prazu.

Estudante UNTL Fakuldade Medisina halo promosaun ba dokumenteu promove ai-han saudavel ba vizitante sira, iha amibitu feira nasionál hodi selebra “Loron Mundiál ba Ai-han Seguru”. Iha Largo Lesudere Dili, segunda (06/06). Imajen Tatoli/Francisco Sony

Iha biban hanesan, Diretór Interinu Prestasaun Saúde, Nilton do Carmo da Silva, hateten, Ministériu Saúde nia papél mak asegura hahan ne’ebé mak seguru ba  konsumidór sira, nune’e ba sidadaun sira ne’ebé prepara hahan tenke saudavél hodi ema konsumu ho saúde ne’ebé di’ak.

Hahan ne’ebé mak saudavél no seguru ba ema nia moris mak ai-han  ne’ebé esensiál  tebes.

“Ministériu Saúde sei kontinua halo promosaun no prevensaun atu asegura katak hahan sira ne’e seguru duni ba ita-nia konsumidór sira no populasuan sira atubele hatene saida mak aihan seguru,” nia afirma.

MS ekoraja iha komemorasaun loron mundiál ai-han seguru ne’e atu otél no restaurant no negosiante sira, bainhir oferese ka fa’an ai-han rim aba komunidade sira presiza garante seguru ba saúde públika.

Jornalista : Felicidade Ximenes

Editór        : Florencio Miranda Ximenes

PUBLISIDADE HUSI MTCIiklan