Karreta Funeráriu. Imajen Tatoli/Osória Marques.

DILI, 06 juñu 2022 (TATOLI)–Diretór Diresaun Naisonál Asisténsia Sosiál (DNAS), Lucas Tois, hateten Ministériu Solidariedade Sosiál no Inkluzaun (MSSI) planea sosa karreta Hilux lima hafoin kompañia modifika fali sai karreta funeráriu hodi tula mate-isin.

Notísia Relevante: 2022, MSSI sei sosa karreta funeráriu lima

“Ita planu atu sosa karreta Hilux depois modifika fali ba karreta funeráriu tanba ita-nia motorista dehan atu tula mate isin ba área remota tenke sosa Hilux mak di’ak tanba antes ne’e ita hola karreta Trnton maibé ladún di’ak,” Lucas Tois hateten ba Agência TATOLI, iha nia knar fatin Caicoli, Dili, segunda ne’e.

Karreta funeráriu lima ne’e hodi reforsa munisípiu Dili tanba públiku kestiona atendimentu ba ema mate ne’e ladún di’ak.

Bainhira karreta ida tula sai tiha mate ida ba munisípiu ida mak derrepente mate ida iha tan ne’e susar atu atende, entaun presiza duni fasilidade ne’ebé hodi atende situasaun hirak ne’e.

Entaun, nia dehan, tinan ne’e MSSI planea atu sosa karreta Hilux maibé haree took kompañai ida-ne’ebé mak manan konkursu atu sosa, tanba daudaun ne’e kompañia tolu mak konkorre ona ba vaga ne’e.

“Kompaña nasionál tolu mak agora kompete ona ba vaga ne’e maibé ita haree no hein, sé mak sai manan-na’in ba vaga ne’e. Ha’u rona informasaun katak semana rua mai tan ita hatene ona kompañia ida-ne’ebé mak sei responsabiliza,” nia dehan.

Diretór ne’e hatutan, osan ne’ebé mak atu sosa karreta funeráriu lima (5) hamutuk rihun $200-resin no kada karreta sei kona rihun $47.

Daudaun ne’e MSSI iha karreta funeráriu 40 resin, iha Dili karreta funeráriu 13 ba atendimentu públiku no ida ba ema importante (VIP- sigla Inglés) no kada munisipiu inklui Rejiaun Administrativu Espesiál Oé-Cusse Ambeno ( RAEOA ) iha karreta rua (2) ne’ebé Governu sosa ona iha 2009 no 2013 .

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here