Tiago Amaral Sarmento . Imajen/Mídia MJ

DILI, 06 juñu 2022 (TATOLI)— Governu Timor-Leste liuhosi Ministériu Justisa (MJ) hahú mellora sistema dadus rai no uma Estadu hodi implementa Dekretu-lei númeru 19/2004, loron 29 dezembru, kona-ba rejime jurídiku bens no imóvél, atu “obriga” empreza arrendatoriu sira selu arrendamentu ba Estadu.

Ministériu Justisa liuhosi Gabinete Inspesaun no Auditória (GIA), hahú halo indetifikasaun no levatamentu dadus ba rai no uma Estadu ne’ebé kompañia no investór halo kontratu investimentu ho Governu ho durasaun tinan lima too tinan 30, maibé la selu arrendamentu ba Estadu.

Notísia relevante:  Durante mandatu, MJ promete obriga investidór sira kumpre akordu arrendamentu

Atu hatene kle’an polítika Ministériu Justisa ba implementasaun Lei númeru 1/2003 no Dekretu-Lei númeru 19/2004 ne’ebé ko’alia kona-ba propriedade Estadu no kobra arrendamentu, Jornalista Agência TATOLI hala’o intervista eskluziva ho Ministru Justisa, Tiago Amaral Sarmento, iha kna’ar fatin, Colmera.

Ministériu Justisa rejistu arredatoriu hira dezde Timor-Leste ukun aan dadus atulizadu? Arredatariu nasionál no internasionál?

Iha 2003, Governu dahuluk Konstitusionál produs lei númeru 1/2003 kona-ba rejime bens no moveis, ne’ebé iha lei ne’e iha limitasaun buat balun, maibé iha 2004 tesik mai ita foin iha kódigu sivil, nune’e ita produs lejizlasaun seluk ka norma seluk kona-ba rai nian, liu-liu kona-ba rai no uma Estadu nian arredamentu  ninia inklui iha 2017 too 2018  ita produs lei barak liután kona-ba titularidade definisaun kona-ba bens no moveis.

Ministru Justisa (MJ), Tiago Amaral Sarmento, hala’o reuniaun dahuluk ho Prezidente ENSUL Engenharia, Alexandre Marques Couto. Imajen/Natalino Costa.

Iha 2017, konsege prodús lei númeru 13/2017, kona rejime espesiál ba definisaun titularidade bens no imóvel, lei númeru 8/2017, kona- bá espropriasaun ba utilidade públika lei númeru 9/2002 kona-ba nasionalidade. Lejizlasaun hirak ne’e atu define kona-bá rai no uma ne’ebé pretense ba Estadu no privadu nian.

Nune’e, Governu liuhosi Ministériu Justisa implementa lejizlasaun hirak ne’e atu halo atribuisaun titulu na’in ba rai, halo mós kontrata ho empreza arrendatóriu hosi nivél nasionál no internasionál ne’ebé hatur hahú hosi 2003 too ohin loron.

Bele esplika kontratu arredatariu sira no nia pagamentu ne’e halo nusa?

Naturalmente atu halo arredamentu ba rai no uma Estadu  parte sira  bele hato’o pedidu ba Diretór munisipál , Diretór Teras no Propriedade Munisipál  no bele hatoo ba iha Sekretáriu Estadu Terra no Propriadade, hafoin Ministériu Justisa uza kompeténsia atribui ka selebra kontratu arredamentu  ba parte hotu.

Ministru Justisa mós delega ona kompeténsia ba Diretór munisipál sira atu selebra kontratu arrendametu ho sidadaun sira ho valór $100 ba kraik, hosi valór  $100 too $200 delega  ona kompeténsia ba Sekretáriu Estadu Terras no Propriadade (SETP) mak asina kontratu arredamentu. Valór $200 ba leten ne’e Ministru Justisa mak iha kompeténsia atu selebra kontratu arrendamentu.

Tuir dadus iha arredatoriu sira hamutuk 4.225 maka la kumpre dever iha 2017. Tanba sa ida ne’e akontese? Ministeriu halao kontrolu ho di’ak oinsa? 

Loos, tuir dadus ne’ebé publika antes ne’e, sidadaun ne’ebé okupa patrimoniu Estadu hanesan edifísiu no rai Estadu hodi halo negósiu hamutuk 1.114, ne’ebé ninia presu selu sei haree ba klasifiksaun no poténsia rai, uza hela ka halo negósiu, nia presu sei la hanesan.

Alende ne’e, rejista 8.340 arrendatáriu iha territóriu ne’ebé mak halo kontratu utiliza patrimóniu Estadu no selu kada fulan.

Enkuantu, arrendatáriu hamutuk 4.115 maka selu ativu, maibé 4.225 mak la kumpre selu arreendamentu dezde 2017 too 2020.

Nune’e, iha ha’u nia-mandatu sei aplika lei, nune’e obriga investór nasionál no internasionál ne’ebé utuliza rai no Uma Estadu atu kumpre halo pagamentu.  

Ministériu Justisa sei kontrola másimu atu investor ne’ebé la kumpre selu arredamentu,sei kansela akordu arrendamentu no  maske investór sira arredamentu, maibé la halo atividade ruma ne’e mós sei kansela no retira kontratu arredamentu.

Hahalok ida ne’e fó prejuizu hira ba Estadu?

Tuir dadus hosi Sekretaria Estadu Terra no Priopriedade (SETP) hatudu iha tinan 2019 to’o 2020, Srekolla reseita hamutuk millaun $4,2 no tinan 2021 rekolla millaun $1,2. Enkuantu iha tinan 2017 to’o 2018 rekolla millaun $2-resin.

Maibé, ita akompaña kompañia ka arredatoriu ida la kumpre dever hodi selu arrendamentu konserteza fó prejuizu ba Estadu. Tanba arrendatáriu hamutuk 4.225 mak la kumpre halo pagamentu ne’e kada tinan Estadu lakon reseita kuaze milaun $99.

Iha arredatoriu balun ne’ebé maka too agora seidauk identifika ba uza patrimóniu Estadu ho gratuita?

Loos, Ekipa hosi Ministériu Justisa halo ona identifikasaun katak daudaun kompai balun uza uma ho rai Estadu gratuita halo atividade ekonomia, maski sira iha ona kontratu arredamentu.

Iha kapitál Dili, Ministériu Justisa deteta kompañia  hamutuk 83 mak iha kontratu arrendamentu maibé la halo pagamentu, nune’e tuir kalku kompañia ne’ebé ativu selu arredamentu ne’e 40%  no la selu 60%. 

Atu kontribui reseita ba Estadu hodi hamenus foti osan barak liuhosi fundu minarai, saida maka Ministériu presiza halo hodi  arrekada reseita barak? Tanba ita haree katak ema balu la selu arrendamentu?

Alende, rekolla fonte reseita liuhosi arredamentu rai no uma Estadu, Ministériu Justisa  liuhosi Diresaun Jerál Servisu Rejistu Notariádu  ne’ebé halo notáriu mós kontribui reseita ba kofre Estadu.

Notísia relevante:  MJ sei obriga kompañia-sira selu arrendamentu rai no uma Estadu

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here