Funsionáriu estatístika RAEOA foto hamutuk ho formadór sira hosi Ministériu Finansa, hafoin abertura formasaun durante loron lima. Imajen mídia ZEESM.

OÉ-CUSSE, 06 juñu 2022 (TATOLI) – Ministériu Finansas (MF), segunda ne’e fasilita formasaun ba funsionáriu estatístika na’in-10 iha Rejiaun Administrativa Espesiál Oé-Cusse Ambeno (RAEOA) durante loron lima, atu eleva sira-nia koñesimentu kona-ba atividade rekolla dadus ba Índise Presu Komsumidór (IPK) iha rejiaun ne’e.

Formasaun ne’e, abertura hosi Diretór Rejionál ba Unidade Planeamentu Monitozisaun no Avaliasaun (UPMA) Marcos Seo, husu ba sira hanesan formandu, bele aproveta semana ida-ne’e hodi aprende.

Tanba Oé-Cusse, hanesan rai enklave persiza hetan formasaun beibeik hosi Governu Sentrál, nune’e bele mellora serbisu administrasaun públika iha RAEOA ho susesu, tanba Oé-Cusse, jere rasik nia autonomia no administrativa.

Xefe Departamentu Estatístika RAEOA, Florinda de Fátima Bobo, informa formasaun ne’e hala’o durante loron lima tuituir malu, 06-10 juñu, hahú segunda to’o sesta semana ne’e, no formasaun durante loron haat nia laran sei fornese materia hosi tékniku nasionál sira iha Ministériu Finansa, hodi aprende kona-bá materia IPK no ensera ho prátika IPK iha terrenu.

Xefe Departamentu Estatístika RAEOA, Florinda de Fátima Bobo. Imajen mídia ZEESM.

“Ohin ami abertura ba ami-nia funsionáriu foun-sira hamutuk na’in-10, ne’ebé rekruta ona iha 2021, persiza hetan formasaun, nune’e bele eleva sira-nia koñesimentu kona rekolla dadus ba servisu Índise Presu Komsumidór, tanba servisu ne’e hanesan atividade rútina iha estatístika rejionál,” Xefe departamentu estatístika RAEOA, Florinda de Fátima Bobo informa.

Objetivu hosi servisu IPK ne’e, hanesan sasukat ida ba nível presu ba produtu merkadu, no serbisu sira-ne’ebé kompra no konsumu hosi komunidade uma-kain, tanba presu sasán dalaruma sa’e no tún, inflasaun ne’e hanesan presu sasán sa’e, ne’ebé atu sukat inflasaun iha rai laran, entaun tenke liuhosi servisu IPK ne’e.

Nia informa, parseiru permanente iha Oé-Cusse durante ne’e sai sampel ba IPK hodi atribui dadus ba estatístika rejionál mak hanesan, loja Paineno iha merkadu Numbei, loja sr Kamilu Lelan iha Kruz, loja Oliveira iha merkadu Maumate, Naimeko.

“Ami-nia item kada semanál iha 15 item, iha kada fulan hamutuk item 25, kada semanál ami akompaña ho staf-sira ami rekolla dadus presu sasán, liuliu kona-bá nesesidade báziku, ai-fuan, modo tahán, presu kombustível, osan eskola no presu billete ró nian ba transporte marítima,” nia informa.

Totál funsionáriu estatístika iha Rejiaun Administrativa Espesiál Oé-Cusse Ambeno hamutuk na’in-25.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here