Saudozu Nicolau dos Reis Lobato. Imajen/espesiál

DILI, 06 maiu 2022 (TATOLI)—Xefe Bankada Fretilin iha Parlamentu Nasionál, Deputadu David Dias Ximenes ‘Mandati’, kontinua ezije Governu atu ko’alia ho Governu Indonézia hodi buka-tuir saudozu Nicolau Lobato no sira seluk nia ruin ne’ebé to’o agora seidauk hatene nia paradeiru.

Notísia Relevante: Governu hein resposta hosi Indonézia kona-ba saudozu Nicolau Lobato nia ruin  

“To’o loron ona, tempu ona, ita-nia Governu buka-tuir saudozu Nicolau Lobato no eroi sira seluk nia ruin. Ha’u dehan beibeik resposta la klaru nafatin presiza mate-ruin mai fali hodi hakoi tuir ema nu’udar eroi,” Deputadu Mandati levanta iha plenária Parlamentu Nasionál, segunda n’e.

Nia dehan, asistente komandate militár Indonézia ne’ebé uluk iha okupasaun hanesan operasaun ninian ida seluk naran señor Porwanto ne’ebé halo enkontru ho maun Xanana ho tan Prabowo agora sei moris hela, husu took sira Nicolau Lobato nia ruin ne’e iha ne’ebé.

“Ho sira seluk tan vítima ba pembersihan ba kuadru sira mai hosi ai-laran 1979, ida-ne’e hosi kapitaun Mudi uluk nia mak subtitui Purwanto, kuandu sai hosi diretór komandu ninian, husu nia hatene ema hirak ne’e sira lori ba ne’ebé,” nia haktuir.

Aleinde ne’e, Mandati haktuir, iha 1980 kapituan Subagio ne’ebé horisehik sai fali Panglima (Xefe Estadu Maór) ho Majór Alimasa ho Suroto uluk iha kasih satu KODIM Dili nian, ba akontesimentu 10 juñu 1980 ninian kala-kalan lori sai timor-oan ne’e, lori ba ne’ebé.

Notísia Relevante: PN kontinua ejize Governu buka-tuir Nicolau Lobato nia ruin

Tuir nia, timor-oan sira-ne’ebé mate iha akontesimentu 1983 nian balun ba lori ba Kupang-Indonézia hanesan Cancio Lima, Benjamin Guterres, António do Esperito Santo, no mós iha 1997 David Daitula ninian ne’e, lori ba ne’ebé,” nia dehan.

Tanba ne’e, ho komandante militár Indonézia ne’ebé uluk mai iha Timor-Leste daudaun barak mak sei moris, Governu liuhosi Ministériu ba Asuntu Kombatente Libertasaun Nasionál (MAKLN) koordena ho Ministéiru Negósiu Estranjeiru no Kooperasaun (MNEK) atu bele komunika.

“Nu’udar timor-oan, hanoin ita-nia maluk sira-ne’e mate obrigasaun dever hodi buka tuir,” nia ezije.

Hatán ba ne’e Governu liu hosi Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hateten preokupasaun sira-ne’e antes levanta ona no MAPKOMS enkamina ona ministéiru tutela maibé respota hanesan, nune’e PN bele hato’o karta direta ba ministéiru tutela atu bele mai direta iha plenária PN hodi diskute di’ak liután konseitu sira atu buka tuir saudozu Nicolau Lobato nia ruin.

Notísia Relevante: Mandati husu Indonézia hatudu Nicolau Lobato nia ruin

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here