Asemblei Jerál Igreja Protestante Timor-Leste (IPTL) hala’o iha 2020. Imajen/Espesiál.

DILI, 06 junu 2022 (TATOLI)—Igreja Protestante Timor-Leste (IPTL) preokupa ho prosesu tratamentu sertidaun kazamentu no RDTL iha rejistu notariadu Ministériu Justisa (MJ), tanba komunidade protestante labele trata sertidaun kazamentu no RDTL hahú hosi 2011 to’o 2022.

“Hahú setembru 2011 to’o fulan juñu 2022, ami labele asesu ba sertidaun kazamentu ka RDTL tanba dekretu-lei ida tenke boot liu fali lei inan. Maibé ami agradese ba Ministru Justisa ne’ebé ho esforsu tomak prepara ona esbozu lei ida ho tópiku rekoñese no liberdade. Nune’e, rona informasaun katak, iha artigu 12 no 45 kestiona kona-ba esbozu lei ne’e. Tanba ne’e, ema protestante espera katak, loron ida kodigu sívil ne’e bele hetan alterasaun ho liafuan ne’ebé tuir lei inan hateten,” Moderadór Igreza Protestante iha Timor-Leste (IPTL), Domingos Alves, hateten iha Diálogu entre Governu liuhosi SEKOMS ho Konviksaun Relijioza iha Timor-Leste, iha salaun SINODE Fomentu Comoro, Díli, segunda ne’e.

Preokupasaun ne’ebé Igreja Protestante hasoru durante tinan 11 nia laran iha buat balun ne’ebé sente hanesan sai preokupante ba ema protestante sira.

Preukupasaun dahuluk kodigu sívil artigu 1475, ne’ebé temi liafuan tolu maka katóliku tradisionál, monogamia no parlamentáriu. Maibé, haree fali iha Konstituisaun Repúblika Timor-Leste, artigu no relijiaun sira, Estadu rekuñese no respeita sidadaun ne’ebé de’it sira-nia organizasaun iha liberdade atu hala’o atividade relijiozu, maibé sira buka halai tuir nafatin lei inan no lei oan sira.

Hatan ba preokupasaun ne’e, Diretór Diresaun Nasíonal Notariadu (DDNN), João Fernando M. Borges, afirma, ligadu ho artigu 1475 kona-ba modalidade kazamentu.

“Ita-boot sira hatene ha’u ho kolega funsionáriu sira akonpaña di’ak preukupasaun sira ne’e uluk antes ita iha kodigu sívil, transkrisaun ba sertidaun kazamentu ita halo hotu ba konviksaun relijiosu hotu, ne’ebé kuandu sira aprezenta ba ami sertidaun kazamentu, ami transkreve ba sertidaun kazamentu rejistu sívil RDTL Estadu nian. Hafoin, kodigu sívil iha 01 janeiru 2012 kuandu aprovadu no promulga hosi Prezidente Repúblika sai ona lei hanesan funsionáriu públiku no ajente servidór povu no Estadu ami hakruuk ba lei,” nia dehan.

Nia hateten, iha lei artigu 1475 kodigu sívil ita dehan lei sívil ne’e komplikadu liu iha nasaun hot-hotu, tanba livru to’o haat no nia prosesu iha tribunál mós todan, han kustu barak no lori  tempu barak.

Iha ne’ebá ko’alia kona-ba modalidade kazamentu, tipu kazamentu hira mak submete ba atu halo rejistu sívil. Modalidade ida mak kazamentu dahuluk katóliku, barlaqueadu monogamiku no kazamentu sivil.

“Enkuanku, agora dadauk saida mak ami halo, ami transkreve de’it sertidaun kazamentu ne’ebé igreja katólika selebra ona, lori mai ami transkreve ba sertidaun kazamentu rejistu sivil nian, maibé modalidade kazamentu rua seluk hasoru hela problema, tanba to’o agora kodigu rejistu sívil iha hela Konsellu Ministru seidauk hetan aprovasaun. Tanba ne’e, ita seidauk bele halo selebrasaun ba kazamentu sívil no kazamentu barlakeadu monogamiku,” nia afirma.

Maibé, dala barak barlakeadu Xefe Suku sira halo deklarasaun ba Rejistu Notáriadu la simu, tanba la’ós maneira hanesan ne’e tanba lei suku nian la fó kompeténsia ba xefe suku sira atu halo deklarasaun barlakeadu no iha artigu 23 fó ba sira atu halo deklarasaun nasimentu no óbitu, enkuantu kazamentu ne’e labele tanba nia forma espesifiku.

Sekretáriu Estadu Komunikasaun Sosiál (SEKOMS), Merício Juvinal dos reis ‘Akara’, esplika prosesu Ministériu hatama ajenda ba Konsellu Ministru (KM), liuhosi Prezidénsia Konsellu Ministru no hafoin, Prezidensia Konsellu Ministru nia ekipa tékniku no jurista sira sei análiza ba proposta lei sira, kuandu tuir ona estandar mak tau ba iha ajenda Konsellu Ministru.

“Tanba, iha Konsellu Ministru labele ita foin ezbosu no seidauk klaru hatama kedas, tanba desizaun Konsellu Ministru ne’e desizaun aas liu ona, ne’ebé kuandu ba ona ne’ebá ne’e katak di’ak ona. Nune’e, ha’u espera ita-nia Ministru Justisa Kompleta hotu prosesu ne’e. Hosi ha’u-nia parte fó hanoin ba Prezidensia Konsellu Ministru, se tuir ona regra bele hatama iha ajenda Konsellu Ministru, espera se buat hotu la’o di’ak, tinan ne’e ita-boot (Igreza Protestante) sira bele iha ona informasaun kona-ba pozisaun lei ne’e,” nia dehan.

Entretantu, tuir dadus hosi Moderadór Igreja Protestante iha Timor-Leste (IPTL), Domingos Alves hateten Igreja Protestante iha Timor-Lorosa’e nia eziste iha rejiaun lima (5), hanesan iha parte Leste iha munisípiu Viqueque, Baucau no Lautém ho totál familia 750 no membru 3.598.

Iha parte Oeste, iha munisípiu Liquiça, Ermera no Bobonaro, ho totál familia 731 no membru 3.355. Iha parte Súl iha Aileu, Ainaro, Manufahi no Covalima, ho totál familia 263 ho nia membru 855 no iha parte Oé-Cusse ho totál família 95 ho nia membru 580.

Totál uma-kain iha territóriu laran tomak hamutuk 2,476 ho totál membru 12.000 no aleinde ne’e, evangelista hamutuk 34 no nia evangelista 29 no vigária na’in-6, totál servidór hamutuk 69.

Igreja Protestante iha Timor-Leste hahú eziste iha Timor-Leste iha loron 09 fulan-jullu 1988 ho naran Igreja Kristen Timor-Timor. Hafoin 30 agostu 1999, timor-oan hotu deside hodi haketak an hosi Indonézia hodi harii nasaun ida ho naran Repúblika Demokrátika Timor-Leste (RDTL).

Nune’e, iha tinan 2000 Igreja Protestante iha Timor-Leste hala’o nia kongresu nasionál ba dala tolu (3), iha tempu ne’ebá, kuandu vizita sira hosi delegadu no delegada sira konkorda hodi troka naran hosi kreda Kristen Timor-Timur ba Igreja Protestante iha Timor-Lorosa’e.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here