Prezidente Repúblika, José Ramos Horta akompaña hosi Prezidente Parlamentu Nasionál, Prezidente Tribunál Rekursu, Ministru Justisa no Prokuradór Jerál Repúblika baku babadok iha abertura aniversáriu Ministériu Públiku nian, segunda 6 juñu 2022. Imajen Tatoli/Antonio Daciparu

DILI, 06 juñu 2022 (TATOLI)— Prezidente Repúblika (PR), José Manuel Ramos-Horta, hateten papél Ministériu Públiku (MP) nu’udár pilar importante bá justisa no demokrasia iha Timor-Leste, nune’e enkoraja atu kontinua serbisu ho profisionál atu garante justisa ba sidadaun hotu.

“Husu Ministériu Públiku kontinua atua kazu krimi sira ho profisionál, labele politiza bainhira halo analiza ba kazu abuzu podér sira. Tanba kuandu membru ida hosi Ministériu Públiku balun maka husik espasu ida ne’e mosu sei hatun kredibilidade no integridade Ministériu Públiku nian rasik,” Xefe Estadu José Ramos Horta, hateten bainhira partisipa seremónia aniversáriu dala-20 ezisiténsia Ministériu Públiku ne’ebé hala’o iha salaun Nobre Ministériu Negósiu Estrajeiru Kooperasaun (MNEK), segunda ne’e.

Horta mós nota durante ezisténsia Ministériu Públiku iha tinan 20 ne’e enfrenta problema rekursu umanu no fasilidade atu atende kazu sira iha setór justisa nian.

Ministériu Públiku asume responsabilidade bá defende valór fundamental Estadu direitu nian, ne’ebé fó abut iha sosiedade, iha reprezentasaun Estadu nian iha Tribunál sira no ezersísiu asaun penal iha defeza bá menór, auzente no inkapazes iha defeza ba legalidade demokrátika no promosaun kona-bá kumprimentu bá lei.

MP hanesan institusaun Estadu ne’ebé hola pilár importante iha setór judisiáriu,ne’ebé hala’o asaun penal no ba oin tenke aumenta rekursu umanu kualifikadu nune’e bele fó asisténsia judisiál  ba povu.

“Husu Governu atu buka hakbi’it Ministériu Públiku liuhosi aumeta rekursu umanu, kria kondisaun hodi mellora di’ak liu tan serbisu Prokuradór Jerál Repúblika atu ba oin bele fó asisténsia justisa ba povu,” Horta rekomenda.

Alende ne’e, Xefe Estadu husu ba Ministériu Públiku atu promove igualidade jéneru tanba númeru feto iha MP menus liu iha posizaun importante sira.

Iha biban hanesan, Prezidente Parlamentu Nasionál, Deputadu Aniceto Longuinhos Guterres Lopes, hato’o kongratulasaun ba MP nia ezisténsia ba tinan dala-20.

“Husu nafatin Prokuradór Jerál Repúblika (PJR) kontinua hatudu dezempeñu di’ak hodi atende kazu krime iha rai laran no krime transnasionál sira,” Prezidente PN ne’e sujere.

PPN kompromete kontinua apoia MP liuhosi lejizlasaun sira ne’ebé sei menus atubele fasilita serbisu hodi atende kazu krime sira.

Menus rekursu umanu no fasilidade

Prezidente Tribunál Rekursu (PTR), Deolindo dos Santos, dehan maske MP ho Tribunál Rekursu hasoru dezafiu barak, maibé la hamate Espiritu hodi garante justisa ba sidadaun hotu.

“Rekursu umanu no fasilidade ne’ebé limitadu ne’e la sai dezafiu, maibé kontinua maka enkoraja ita hodi kontinua hakat hodi povu bele sente justisa. Tanba iha difikuldade, maibé Ministériu Públiku hatudu ona progresu balun no bele lori justisa besik liu povu,” PTR ne’e enkoraja.

Entretantu, Prokuradór Jerál Repúblika (PJR), Alfonso Lopez, rekoñese durante ezisténsia Ministériu Públiku ba tinan 20 hasoru difikuldade barak hanesan menus rekursu umanu no fasilidade.

“Ita hahú harii instituisaun ho hakbi’it ne’ebé iha, maibé konsege alarga ka instala edifisiu Ministériu Públiku iha Ermera, Viqueque, Maliana no Munisipiu sira seluk no konsege harii Gabinete Kombate Korrupsaun atu lori justisa hakbesik povu no defende direitu povu nian asesu ba justisa,” nia afirma.

Daudaun ne’e,totál númeru Prokudarór na’in-37, nune’e presiza halo rekrutamentu atubele mellora atendimentu ba kazu krime no sivíl sira iha Timor-Leste.

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here