Foinsa’e na’in-tolu hala’o hela sira-nia atividade hodi hili sasán uzadu hanesan kalen no besi-aat sira-ne’ebé soe iha lixeira Tibar, sesta (05/02/2021). Imajen TATOLI/António Gonçalves.

DILI, 06 maiu 2022 (TATOLI)—Deputadu hosi Bankada Fretilin iha Parlamentu Nasionál, Fabião Oliveira, husu ba Governu liuhosi ministéiru relevante atu muda urjente lixeira Tibar, munisípiu Likisa ba fali fatin seluk.

“Hanoin urjentemente Governu haree atu muda ona fatin hosi Tibar ba fali iha fatin seluk. Segundu, husu Governu haree ona oinsa mak atu bele halo resiklazen ba iha lixu sira-ne’eba hodi labele abitua sunu. Se lae, ita-nia populasaun aban-bainrua bele sofre hotu moras infesaun vias respiratóriu,” Deputadu Fretilin ne’e levanta liu hosi plenária Parlamentu Nasionál, segunda ne’e.

Nia rekomenda ba Governu, importante muda fatin ka prioridade resiklazen lixu sira-ne’e hodi tau iha nia fatin hodi labele sunu lixu, se lae ahí-su’ar kontamina ho kímika fó afeta ba ema-nia saúde.

“Hanoin rekomenda ba Governu atu haree kestaun ne’e urjente atu rezolve tanba iha Tibar populasaun barak mak hela iha ne’eba,” nia dehan.

Tanba, nia dehan, iha Tibar ne’ebá iha mós klínika hosi madre sira-ne’ebé halo tratamentu maiória ba pasiente sira iha Tibar ne’ebá ne’e mesak sofre moras infesaun vias respiratóriu.

Atu halo prevensaun ne’e, nia hateten, tenke hahú hadook an hosi lixu hodi sunu iha populasaun sira-nia hela fatin ka besik iha área populasaun sira hela bá.

Hatán ba preokupasaun ne’e, Governu liuhosi Ministru Asuntu Parlamentár no Komunikasaun Sosiál (MAPKOMS), Francisco Jerónimo, rejista hela preokupasaun hosi membru Parlamentu Nasionál sei hato’o ba ministéiru tutela atu bele tau atensaun.

Notísia Relevante: PN aprova orsamentu adisionál millaun $2,3 ba Autoridade Munisipál Dili

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here