Prezidente Komisaun Nasionál Kontra Kombate Traballu Infantil no Inspesaun Jerál (CNCCTI-IG, sigla portugés), Aniceto Leto Soro, hamutuk ho parseiru dezenvolvementu International Labour Organization (ILO) no UNICEF hala'o enkontru ho Xefe Estadu, José Ramos Horta. Imajen/Mídia PR.

DILI, 07 juñu 2022 (TATOLI)—Prezidente Komisaun Nasionál Kontra Kombate Traballu Infantil no Inspesaun Jerál (CNCCTI-IG, sigla portugés), Aniceto Leto Soro, koopera ho parseiru dezenvolvementu International Labour Organization (ILO) no UNICEF hala’o enkontru ho Xefe Estadu, José Ramos Horta, hodi relata rezultadu peskiza nasionál traballu infantil iha Timor-Leste kuaze rihun 52.

Notísia Relevante: Traballu infantil aumenta, MSSI husu PN aselera lei protesaun labarik

Rezultadu peskiza ne’e, CNCCTI-IG hala’o hahú hosi tinan 2016 mai to’o 2022 ne’ebé sira konsidera prejudika ba labarik sira-nia edukasaun, dezenvolvementu fíziku no intelektuál.

Prezidente Komisaun Nasionál Kontra Kombate Traballu Infantil no Inspesaun Jerál (CNCCTI-IG, sigla portugés), Aniceto Leto Soro. Imajen/Mídia PR.

“Ohin, ami aprezenta ba Xefe Estadu kona-ba rezultadu servisu ne’ebé ami halo. Primeiru, ami halo peskiza nasionál kualitativu no kuantitativu ne’ebé ami halo tiha ona iha 2016-2022 ne’ebé eziste traballu infantil iha Timor Leste purvolta rihun 52 ne’ebé konsidera servisu ne’ebé aat, prejudika ba sira nia edukasaun, dezenvolvementu fíziku no intelektuál ne’ebé ita presija tau iha asaun emidiatu, medida iha ita-nia planu asaun nasionál ba kontra traballu infantil hodi nune’e bele elimina ka solusiona alternativa saida mak ita bele fó,” Aniceto Leto Soro hateten ba jornalista sira, hafoin ramata enkontru ho Xefe Estadu, José Ramos Horta, iha Palásiu Prezidensiál Nicolau Lobato, Bariru Pite, segunda ne’e.

Nia dehan, hosi konvite ne’e Xefe Estadu bele hatene servisu KNKTI nian no KNKTI mós konvida Xefe Estadu atu bele partisipa no fó mensajen vizaun polítiku ba selebrasaun loron mundiál traballu infantil ne’ebé monu iha loron 12 juñu no sei realiza iha Covalima.

“KNKTI mós konvida Xefe Estadu nia disponibilidade atu bele partisipa,” nia dehan.

Tuir nia, KNKTI mós aprezenta ona ba MKAE kona-ba planu nasionál kontra traballu infantil ho durasaun tinan lima.

“Ami mós aprezenta lista atividade ne’ebé probiodu ba traballu infantil, lista ne’ebé mós ami hateten iha ona Gabinete Ministériu Koordenadór Asuntu Ekonómia (MKAE) nian. Ami haree katak presiza mós apoiu ida-ne’e atu bele aselera hodi ajuda proteje labarik sira liu-liu idade kiik ne’ebé ho servisu todan,” nia dehan.

Nia esplika, labarik sira ne’ebé servisu forsada mak iha munisípiu Aileu, Ainaro Ermera, Oé-Vusse no Suai-Covalima.

“Sira-ne’e maiória labarik ne’ebé servisu ho idade kiik, hosi tinan 5 to’o 17,” nia dehan.

Iha enkontru ne’e PR, José Ramos Horta aprezenta ninia vizaun ho nia esperiénsia ne’ebé ko’alia liu kona-ba traballu infantil ne’ebé presiza iha ideia sira tuir realidade Timor no Xefe Estadu sei aperejenta ba Primeiru-Ministru, Taur Matan Ruak.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here