CAC no United Nation Office on Drugs and Crime (UNODC) realiza semináriu avaliasaun risku korupsaun iha aprovizionamentu setór saúde iha Timor-Leste. Iha Hotel Timor Dili, segunda (06/06). Imajen Tatoli/Francisco Sony

DILI, 06 juñu 2022 (TATOLI)— Comissão Anti-Corrupção (CAC) koopera ho Gabinete Rejionál Nasaun Unida nian kona-bá droga no krime no Gabinete Rejionál ba Sudeste Aziátiku no Pasífiku nian (UNODC/ROSEAP-sigla inglés) hamutuk Ministériu Saúde, segunda ne’e, realiza semináriu internasionál hodi  avaliasaun risku korrupsaun iha setór saude iha kontekstu pandemia COVID-19 iha Timor-Leste.

Semináriu internasionál ne’e hala’o durante loron tolu hahú hosi loron 6 too 8 juñu ho objetivu atu halo identifikasaun ba vulnerabilidade no rísku korrupsaun hodi bele define liután asaun no medida sira hodi  evita ka hamenus konsekuénsia sira.

Avaliasaun ne’e mós atu halibur parte interesada relevante atu identifika rísku, avalia probabilidade no impaktu potensiál hosi kada eskema korrupsaun no sujere asaun mitigasaun, kontrolu no prosesu sira.

Korrupsaun iha setór saúde sai hanesan fenomenu ida ne’ebé malisioza tebes ne’ebé estraga fundamentu Estadu direitu hodi distorse distribuisaun ne’ebé justu ba ríkusoin Estadu no hamenus kualidade atendimentu médiku ne’ebé disponivel.

Partikularmente, setór saúde vulnerável tanba kompleksidade servisu médiku no sasan lubuk ida ne’ebé presiza involve ema barak husi setór públiku no privada.

Alende ne’e, buat ne’ebé atrativu ba autór korruptu sira mak kuantidade boot ba sasán sira ne’ebé envolve, bainhira lakon, kauza aumentu makaas iha kustu atendimentu saúde nian no hamenus atividade, kualidade no volume prestasaun servisu saúde.

Ho pandemia COVID-19, setór saúde vulneravel liuba korrupsaun, liuliu ba iha aprovizionamentu emerjénsia ba distribuisaun vasina, ekipamentu protesaun pesoál no servisu no sasán sira seluk.

Komisáriu CAC, Sérgio de Jesus Costa Hornai. Imajen TATOLI/Francisco Sony

Biban ne’e, Komisáriu CAC, Sergio Horna, hateten semináriu avaliasaun rísku korrupsaun iha aprovizionamentu saúde nian nu’udar oportunu no espasu ida mós hodi hakle’an no eleva koñesimentu ajénte sira ne’ebé hala’o knaar no servisu iha área aprovizionamentu hodi la monu ba krime korrupsaun, abuzu poder, konflitu interese no administrasaun da noza iha situasaun sira emerjénsia nian, liu-liu iha situasaun moras pandemia COVID-19 ninian.

“Semináriu ne’e nu’udar espasu ba ita atubele prienxe ita nia frakeza sira iha aprovizionamentu, kontratasaun públika, ezekusaun orsamentu no mós halo kontrolu no monitorizasaun sira, nune’e bele lori no diresiona ita ba iha situasaun ida loos, no hasees ita husi konflitu interese no abuzu poder,” Komisáriu Sergio Hornai hateten liuhosi diskursu abertura semináriu ne’e.

Komisáriu CAC ne;e hatutan : “Iha korrelasaun ho situasaun COVID-19 ninian, konserteza rekursu lubuk ida ita injeta makaas husi nasionál no internasionál, oinsá ita nia jestaun no kontrolu sira ba rekursu sira ne’e hodi asegura nia sustentabilidade. Oinsá ita bele hasees husi rísku sira korrupsaun nian hodi labele to’o ba assume responsabilidade (kriminál),” nia afirma.

Iha biban hanesan, Koordenadór UN iha Timor-Leste, Roy Trivedy,hateten impaktu hosi korrupsaun iha setór saúde afeita servisu saúde globalmente hodi fó kauza ba ema barak mak sofre.

“Kombate korrupsaun importante atu hasae kualidade servisu saúde hodi salva ema barak nia vida. Tanba maioria rekursu sira ba setór saúde ne’e mai hosi orsamentu Estadu, nune’e ita tenke aseita katak osamentu ka fundu públiku tenke uza ho loloos hodi fó benefisiu ba ema hotu,” Roy Trivedy afirma.

Nune’e, nia sujere tenke kria sistema ne’ebé mak robustu hodi kombate korupsaun no garante transparénsia atu hamtein kofiansa públiku iha instituisaun saúde.

Entretantu, Ministra Saúde Odete Maria Freitas Belo, agradese ba Komisaun Anti Korrupsaun hamutuk ho parseiru dezenvolvimentu sira hala’o atividade ida ne’e hodi haree ba setór saúde ho atensaun.

“Ha’u hatene katak  korrupsaun  iha relasaun ho lei, norma no regra tanba dalabrak ita mós infrenta situasaun má pratika liuhosi abuzu podér, konflitu  interese  ne’ebé akontese sein ita hatene liuliu iha área aprovizionamentu nian,” governante ne’e agradese.

Semináriu ba loron dahuluk hahú ho diskursu husi komisariu CAC, Sergio Hornai, UN Country Resident, Roy Trivedy, Charge de Affair, US Embassy Dr. Thomas Daley no Ministra Saude Dra. Maria Odete Freitas Belo.

Enkuantu Oradór no aprezentasaun matéria workshop loron dahuluk ohin iha sesaun dader nian mai husi peritu nasionál sira husi Diretór CNA Hermegildo Albano ne’ebé aprezenta kona-ba enkuadramentu legál aprovizionamentu públiku, Diretór Ezukitivu SAMES-IP, Santana Martins aprezenta kona-ba rejime jurídiku espesiál aprovizionamentu ba ekipamentu médiku no farmaseutiku, Diretór Jerál Servisu Korporativa MS, Marcelo Amaral aprezenta ezekusaun fundus COVID-19 Minist’eriu Saude, no Inpetór Jerál Estadu, Fransisco de Carvalho aprezenta relatóriu inspeksaun ne’ebé halo iha SAMES-IP.

Iha sesaun loraik nian, worksop kontinua ho aprezentasaun husi sosiedade sivíl, Koordenadór la’o hamutuk Celestino Gusmão ne’ebé aprezenta kona-ba analiza fundu covid-19 nia ezekusaun, no UNDOC Fransesco Checchi kona-ba Observasaun Jerál Korrupsaun Relasiona ho Setór Saude no Matadalan ba Prosesu Avaliasaun Rísku.

Ikus liu termina ho diskusaun nakloke partisipante sira kona-ba analiza ambiente sira ne’ebé permite operasaun ka prosesu sira no analiza síklu sira fornesimentu nian relasiona ho fornesimentu ekipamentu súude.

Partisipa iha eventu refere mai husi entidade nasionál oioin mak hanesan kargu xefia sira husi Ministériu Saude, Ministériu Finansa, CNA, SAMES-IP, Ministériu Públiku, PDHJ, IJE, CAC, FONGTIL, CEPAD, JSMP, La’o Hamutuk, Media, Konsellu Imprensa, Akademica UNTL-departamentu Medicina. Partisipa mós husi entidade internasionál mak hanesan Embaixada Estadus Unidus Amerika-INL, KOICA, WHO, UNDP, UNICEF, ADB, DFAT, USAID, Uniaun Europeia, PFMO, Instituto Camões no PALOP.

Jornalista: Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here