Xefe suku Gildapil,postu administrativu Loloto'e,munisipiu Bobonaro,Emiliano Noronha,Imajen TATOLI/Sergio da Cruz

BOBONARO,  05 junu 2022 (TATOLI)— Xefe suku Gildapil, postu administrarivu Loloto’e, munisípiu Bobonaro,Emiliano Noronha, husu ba Eletricidade de Timor-Leste, Empreza Públiku (EDTL,E.P) atu estabelese loja fa’an pulsa eletrisidade ba komunidade uma-kain 166  iha suku refere hodi fasilita kliente sira.

Nia dehan dezde abitante hirak ne’e asesu eletrisidade iha 2011 no ekipa EDTL,E.P  instala kontadór pré-pagu, hafoin iha tinan 2018, EDTL kontrata kompaña lokál ida fa’an pulsa eletrisidade, maibé, konsetra deit Loloto’e villa. Maibé atividade negósiu ne’e la la’o kuaze fulan haat ka lima hodi difikulta komunidade asesu pulsa eletrisidade.

“Ha’u husu ba EDTL,E.P atu estabelese loja fa’an eletrisidade tanba uma-kain 166 mak susar tebes asesu ba pulsa eletrisidade,darauma kuandu sira atu sosa pulsa entaun tenke kontaktu  ba oan sira iha Dili no família sira iha Maliana mak haruka mai dolar $1 ka $2 hanesa ne’e mak ahi foin bele lakan fila fali, hafoin hotu mak kontaktu fali,” Lideransa komunitáriu ne’e hateten ba ba Jornalista  Agência TATOLI iha Maliana, domingo ne’e.

Maneira atu asesu ba subsídiu pre-pagu eletrisidade. Imajen/EDTL

Situasaun ne’e, nia dehan sai preokupasaun boot ba konsumidór eletrisidade iha suku ne’e liuliu iha tempu udan ne’ebé difikulta ba rede telemovél hodi labele kontaktu família sira iha Dili no Maliana.

“Ha’u akompaña baihira rede telemovél la di’ak no labele kontaktu fali iha Dili no Maliana entaun ho pasiensia sira la hetan naroman,” nia preokupa.

Kestaun ne’e, autoridade lokál sira hato’o ona ba parte kompetente liuliu EDTL,E.P  iha nivél nasionál no iha munisípiu,  maibe too agora seidauk rezolve.

“Hau hanesan lideran lokál ida husu ba governu Liu-liu EDTL atu mantein kompaña ne’ebé faan pulsa eletrisidade no se bele tenke instala loja fa’an pulsa eletrisidade iha suku-suku atu bele fasiilita komunidade sira ne’ebé presiza eletrisidade atu asesu besik liután. Tanba se lae ahi bele tama ona, maibé sente la di’ak nafatin,” nia fó hanoin.

Totál uma-kain iha aldeia Gildapil hamutuk 166, ho total populasaun na’in-743, kompostu hosi Feto 378, mane 365.

Enkunatu, Komunidade aldeia Atus ho nia sub-aldeia Lebos ho total uma-kain 153, ho totál abintante 714, kompostu hosi feto 362 no mane 352 mak dezde okupasaun Indonézia mai too agora seidauk asesu eletrisidade.

Entretantu, Totál komunidade suku Gildapíl na’in-1,457 ho totál uma-kain 319, Suku ne’e rasik geografikamente lokaliza iha área remota besik kedas iha fronteira Timor-Leste ne’ebé baliza ho Atambua Kabupaten Belu Provinsia Nusa Tengara Timur (NTT) Indonézia.

Jornalista: Sérgio da Cruz

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here