Prezidente KFP, Faustino Cardoso. Imajen Tatoli/Celestina Teles.

DILI, 04 juñu 2022 (TATOLI)—Prezidente Komisaun Funsaun Públika (CFP-sigla), Faustino Cardoso, hateten Parlamentu Nasionál (PN) presiza tau prioridade ba alterasaun lei 12/2016 kona-ba seguransa sosiál (SS) ba funsionáriu reformadu sira.

“Dala barak hosi oportunidade oioin liuhosi formál no informál, ami sempre alerta ba entidade kompetente inklui deputadu sira iha Parlamentu Nasionál oinsá mak tau aas prioridade alterasaun lei 12/2016 kona-ba Seguransa Sosiál nian, nune’e bele asegura obrigatoriedade reforma ba funsionáriu públiku sira-ne’ebé mak to’o ona idade efetivu iha servisu funsaun públiku nian,” Prezidente KFP ne’e hateten ba Agência TATOLI, hafoin partisipa lansamentu abertura loron funsaun públika, iha resintu MAE Colmera, Dili, sesta ne’e.

Tanba, nia dehan, to’o agora funsionáriu públiku barak tebes ne’ebé mak tama ona ba idade reforma ne’ebé goza ona reforma tanba ho inisiativa individuál no tanba sira ida-idak rekoñese sira-nia kondisaun saúde tanba katuas ona.

“Sira hola inisiativa rasik hato’o rekerimentu aprezentasaun ba KFP depois servisu hamutuk ho Institutu Nasionál Seguransa Sosiál (INSS) hodi buka prosesu ba sira-nia direitu Seguransa Sosiál nian,” nia esplika.

Nia informa, totál funsionáriu públiku ne’ebé servisu instituisaun Estadu liu ema rihun 35-resin ne’ebé kompostu hosi funsionáriu permanente purvolta rihun 28-resin, depois aumenta tan ajente administrasaun públika maibé la inklui sira-ne’ebé servisu hanesan kazuál ne’ebé selu hosi bens servisu, maibé ne’e fila hikas ba ministériu ka instituisaun públiku nian ida-idak nia responsabilidade ba prosesu rekrutamentu.

Ko’alia kona-ba funsionáriu, tuir nia, funsaun públika abranje hotu-hotu ne’ebé konstitui feto iha 30% funsionáriu públiku nune’e mós ho ema defisiénsia oioin.

“Iha Komisaun Funsaun Públika iha polítika inkluzaun no polítika igualdade jéneru atu enkoraja di’ak liután partisipasaun feto iha funsionáriu públiku no mós atu kria kondisaun ka fó oportunidade ne’ebé hanesan ba ema ho defisiénsia atu nune’e sira mós ida-idak tuir nia kompeténsia bele kontribui ba dezenvolvimentu nasaun liuhosi ingresaun partisipasaun iha funsaun públika,” nia dehan.

Jornalista : Osória Marques

Editór      : Cancio Ximeens

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here