Estrutura PLP nivel aldeia, suku no postu administrative Baucau Vila. Munisípiu Baucau hala’o juramentu iha serimónia reajustamentu estrutura iha Sentro Convenção Baucau vila antiga, sábadu (04/06). Imajen Tatoli/Natalino Belo.

BAUCAU, 04 juñu 2022 (TATOLI)—Partidu Libertasaun Populár (PLP), sábadu ne’e, reajusta estrutura partidu nível aldeia, suku iha postu admistrativu Baucau vila, munisípiu Baucau hodi prepara ba konferénsia nível Munisípiu.

Prezidente Interinu PLP, Abrão José Freitas ‘Mate Restu’ hateten, tuir ajenda partidu programa reajustamentu estrutura partidu nível suku no postu hahú iha munisípiu Baucau ho objetivu atu kompleta estruturu iha baze hodi hasoru konferensia nível munisipál iha fulan jullu.

Prezidente Interinu PLP, Abrão José Freitas ‘Mate Restu’. Imajen Tatoli/Natalino Belo.

“Iha tinan-ne’e ita hakat ba konferénsia munisipál entaun molok to’o iha ne’ebá tenke kompleta estrutura partidu nian iha suku no postu administrativu,” Prezidente Interinu PLP ne’e hateten iha Sentru Konvensaun Baucau (CCB, sigla Portugés).

PLP garante hafoin reajustamentu estrutura iha baze atividade partidu nian bele servisu másimu liután tanba espetativa bele gaña konfiansa iha Baucau bazea ba rezultadu eleisaun parlamentár tinan 2017.

“Baucau, ami laran metin tanba kompleta ona estrutura nível postu,” Mate Restu hateten.

Tuir ajenda, PLP sei realiza konferénsia nível munisipál iha fulan jullu no kontinua kedas kongresu nasionál iha fulan agustu ka setembru.

Estrutura PLP nivel aldeia, suku no postu administrativu Baucau Vila. Munisípiu Baucau hala’o juramentu iha seriimónia reajustamentu estrutura iha Centro Convenção Baucau vila antiga, sábadu (04/06). Imajen Tatoli/Natalino Belo.

Koordenadór PLP postu administrative Baucau Vila, Alfredo Jeronimo Guterres, hateten atividade realiza bazea ba orientasaun partidu hodi reajusta estruturu iha aldeia, suku no postu Baucau Vila nune’e bele hala’o servisu partidu nian hodi prepara an ba konferénsia munisipál no praparasaun hasoru eleisaun parlamentar 2023.

Mezmu hasoru difikultade maibe hafoin reajustamentu estruturua, PLP garante sei forsa liután iha postu Baucau Vila.

“Hosi atividade ne’e ami bele indentifika delegadu sira atu partisipa iha konferénsia munisipál,” Alfredo hateten.

Atividade refere, estrutura nível aldeia, suku no postu Baucau Vila hamutuk na’in-387 hala’o juramentu hodi reafirma pozisaun no kompromisu atu servisu hodi fó susesu ba partidu PLP.

Partisipa iha reajustamentu estruturu postu Baucau vila kompostu hosi Prezidente Interinu PLP, Abrão José Freitas ‘Mate Restu’, koordenadór PLP munisípiu Baucau, Noe da Silva Ximenes ‘Buka Tuir’, konsilleiru PLP, Cornelio Gama ‘L-7’ no membru Konsellu Politika Nasionál (CPN, sigla Portugés), António Freitas.

Jornalista    : Natalino Belo

Editór          : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here