Feto potensiál iha Covalima partisipa enkontru armonizasaun. Imajen Tatoli/Celestina Teles.

COVALIMA, 04 juñu 2022 (TATOLI)–Centro Comunidade Covalima (CCC), susesu kapasita feto potensiál iha Covalima tanba hafoin tuir formasaun iha CCC feto potensiál sira bele foti desizaun iha família, komunidade no iha instituisaun Estadu.

“Bazea ba esperiénsia ne’ebé ita-nia feto maluk sira konta katak durante ne’e feto sira iha duni mundansa bainhira CCC fasilita formasaun ba feto sira iha área oioin hanesan área negosiu no lideransa, diskursu públiku tanba sira bele ona foti desizaun desizaun iha família, komunidade no instituisaun Estadu,” Diretór Centro Comunidade Covalima (CCC), Alberto de Jesus, informa ba Agência Tatoli, hafoin realiza enkontru armonizasaun no advokasia ba feto potensiál, iha resintu CCC, Kampung Baru, sábadu ne’e.

Fofoun Centro Comunidade Covalima (CCC) fasilita formasaun ba feto potensiál sira, sira tauk atu ko’alia, tauk hasoru autoridade no foti desizaun iha família no komunidade maibé hafoin tuir formasaun ne’e sira hahú brani foti desizaun.

“Fofoun ami fó formasaun ba feto sira iha área lideransa no diskursu públiku negósiu sira tauk atu ko’alia sai bainhira hasoru problema iha komunidade. Maibé sira tauk atu ko’alia entaun ha’u rasik hakerek pergunta haruka sira husu ha’u hatoman sira bele ko’alia sai problema ne’ebé sira enfrenta,” nia dehan.

Hafoin CCC fasilita formasaun ba feto potensiál sira iha área oi-oin feto potensiál sira kontente no sira iha duni mudansa tanba feto sira brani atu foti dezisaun, iha sira nia família no iha fatin públiku sira.

Ho nune’e, oras ne’e daudaun feto potensiál iha Covalima sai ona xefe suku, delegada suku no xefe aldeia tanba prinsipiu CCC mak feto mós iha direitu hanesan no promove igualdade jeneru iha Covalima.

Tanba ne’e, CCC Promove feto Covalima atu hetan oportunidade kompete ho mane ba iha posizaun foti desizaun, iha família, komunidade iha instituisaun Estadu no iha nivél Munisípiu.

Tuir rekomendasaun ne’ebé mak feto sira hato’o atu kontinua kapasita feto sira iha área advokasia hodi bele hato’o sira-nia problema ba instituisaun ne’ebé iha podér atu tulun sira.

Feto potensiál Covalima, Monica Moniz, haktuir nia esperiénsia katak Centro Comunidade Covalima fasilita formasaun, nia mós iha ona mudansa tanba brani atu ko’alia no foti desizaun iha família, komunidade no iha instituisaun Estadu sira.

“Hafoin ha’u tuir formasaun ne’ebé fasilita hosi Centro Comunidade Covalima ha’u mós bele hasoru ko’alia ho autoridade sira no bele fahe informasaun iha família no iha públiku no bele kria kampu traballu ba ha’u nia maluk sira,” nia dehan.

Iha enkontru armonizasaun ne’ebé organiza hosi Centro Comunidade Covalima (CCC) ne’e partisipa hosi feto potensiál sira no autoridade lokál sira iha munisípiu Covalima.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here