VIQUEQUE, 03 juñu 2022 (TATOLI)–Prezidente Konsellu Veteranu munisípiu Viqueque, Adriano da Camara ‘Lentil’, konsidera inisiativa implementasaun lei poder lokál no dezentralizasaun administrativa bele fó reseita ba setór agrikultura no turizmu.
“Setór importante maka agrikultura no turizmu hodi garante implementasaun lei poder lokál no dezentralizasaun administrativa ninia sustentabilidade iha futuru. Konsellu Veteranu hanesan órgaun independente sei hala’o ninia knaar tuir atividade ne’ebé liga liu ba veteranu, hanesan verifikasaun dadus veteranu no haree ba veteranus sira-nia moris,” Veteranu Lentil hateten ba Agência Tatoli, iha edifísiu Konselu Veteranu Viqueque, sesta ne’e.
Notísia relevante: Desentralizasaun administrativa hakbesik dezenvolvimentu ba povu
Konsellu Veteranu ne’ebé kompete iha asembleia munisípiu ne’e ami seidauk bele hatene loloos, tanba ida-ne’e kompeténsia Konsellu Veteranus nasionál, enkuantu Konselu munisipál ezekuta de’it.
“Ami fiar implementasaun lei poder lokál no dezentralizasaun administrativa iha munisípiu Viqueque ba futuru sei susesu tanba dezenvolvimentu la fila ba kotuk, maski ohin loron dezenvolvimentu sei nune’e, maibé futuru oin mai dezenvolvimentu sei avansa liután,” nia akresenta.
Jornalista: Vitorino Lopes da Costa
Editora : Julia Chatarina
