Logotipu USAID. Imajen/Espesiál

DILI, 03 juñu 2022 (TATOLI)–Estadu Unidu Amérika (EUA) liuhosi Ajénsia Estadu Unidu ba Dezenvolvimentu Internasionál (USAID, sigla inglés) no Ministériu Finansa (MF), sesta ne’e, anúnsia atividade foun ba tinan-tolu ho kustu millaun $10,2.

Programa ne’e hodi ajuda Governu Timor-Leste institusionaliza sistema komérsiu ne’ebé governa ho di’ak no modernu, profisionál, transparante, responsável, efisiente, efikáz, no responde ba timor-oan inklui kompativel ho padraun internasionál sira.

“Atividade ne’e sei impulsiona komérsiu no kresimentu ekonomia, hasa’e Governu nia reseita, hasa’e integrasaun rejionál no internasionál, no mós haforsa boa governasaun,” Diretora Misaun USAID, Zema Semunegus, hateten liuhosi nota ne’ebé Agência Tatoli simu hosi Gabinete MF, sesta ne’e.

Notísia relevante: Embaixadór EUA anunsia programa foun USAID ho montante millaun $93

Diretora dehan, USAID valoriza kooperasaun no kolaborasaun di’ak ho MF no Autoridade Aduaneira, inklui liuhosi USAID nia projetu Reforma Aduaneira ne’ebé foin ramata daudaun, ne’ebé rezulta poupansa ho estimadamente millaun $38 ba empreza Timór.

“Ami espera bele kontinua sebisu ho Timor-Leste, ne’ebé agora esforsu hela atu halo reforma doméstika sira ne’ebé nesesária hodi aliña totalmente rejime komersiál ho regra Organizasaun Mundiál ba Komérsiu (OMK) no liberaliza ninia komérsiu”, nia otimista.

Enkuantu, tuir pedidu Governu Timor-Leste, USAID sei serbisu hamutuk ho MF, Autoriade Aduaneira, no ajénsia Governu sira seluk, no mós ho setór privadu, hodi hadi’a governasaun komérsiu, fasilitasaun komérsiu, no prosesu alfándega.

Governu EUA fornese millaun $10,2 liuhusi USAID/Timor-Leste nia atividade governasaun komérsiu hodi apoiu Autoridade Aduaneira Timor-Leste inklui ajénsia Governu sira seluk ne’ebé liga ho komérsiu.

Iha biban hanesan, Ministru Finansa, Rui Augusto Gomes, konsidera, lansamentu USAID nia atividade governasaun komérsiu foun ne’e marka pasu importante ida ba Autoridade Aduaneira.

Tuir governante ne’e, apoiu millaun $10,2 signifikante no esensiál hodi permite Autoridade Aduaneira iha ninia jornada atu sai organizasaun independente, konfiável, efisiente, no tau kliente nu’udar sentru iha ninia prestasaun servisu esensiál.

“Governu Timor-Leste agradese Estadu Unidu Amérika no povu amerikanu, ba sira-nia apoiu ne’ebé firme. Governu prontu hakle’an liután parseria hodi alkansa Autoridade Aduaneria nia meta ba longu prazu ne’ebé atu halo komérsiu lalais, simples no justu liu,” Ministru dehan.

Entretantu, apoiu ne’e sei hadi’a prosesu importasaun no esportasaun hodi funsiona tuir melloria prátika globál no padraun sira ne’ebé iha Organizasaun Alfandega Mundiál (WCO, sigla inglés) ninia estrutura padraun, hodi proteje no fasilita komérsiu globál, revizaun konvensaun Kyoto WCO, revizaun deklarasaun Arusha WCO, no akordu fasilitasaun organizasaun mundiál komérsiu, inklui rekizitu ba adesaun iha Asosiasaun Nasaun Sudeste Aziátiku nian.

Programa ne’e sei promove utilizasaun rekursu efisiente no efetivu liután, ne’ebé sei no jere estrutura adekuada hodi fó komersiante no setór privadu sira garante Governu ne’ebé transparante no responsivu ba públiku, International Business Initiatives, empreza kiik ho feto mak nu’udar na’in ho baze iha EUA mak sei implementa atividade ne’e.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here