Administradór Uatucarbau, Alfredo dos Santos. Imajen Tatoli/Vitorino Lopes da Costa

VIQUEQUE, 03 juñu 2022 (TATOLI)—Progresu Jerál konstrusaun Uma Kbiit Laek (UKL) iha postu administrativu Uatucarbau, munisípiu Viqueque, daudaun ne’e serbisu fíziku atinje ona 55% no prosesu konstrusaun la’o di’ak.

“Konstrusaun UKL balun hasoru difikuldade tanba dalan a’at, difísil liu iha tempu udan bainhira distribui materiál ba fatin konstrusaun, liuliu iha suku Afaloikai no Bahatata. Kareta labele tula materiál hodi halo serbisu tanba dalan, maibé suku sira ne’ebé besik estrada ne’e agora balun besik ramata ona. Tanba ha’u baibain sempre ba haree no akompaña serbisu UKL sira iha suku,” Administradór Uatucarbau, Alfredo dos Santos, hateten ba Agência Tatoli, via telefónika, sesta ne’e.

Notísia relevante: Progresu konstrusaun UKL Viqueque atinje 70%

Nune’e, nia husu traballadór, fasilitadór Programa Nasionál Dezenvolvimentu Suku (PNDS) no fornesedór sira hodi aselera prosesu konstrusaun.

Tuir  dadus, progresu UKL iha suku Afaloicai, postu administrativu  Uatucarbau, iha uma tolu, ba benifísiariu na’in-tolu hanesan Helena Pinto,  Afonso De Jesus no  Manuel da Costa, ne’ebé daudaun konstrusaun fíziku atinje ona 25%, ho totál orsamentu $51.000.

Progresu UKL suku Bahatata ba benifísiariu na’in-tolu hanesan Elvira de Carvalho, Casilda Alves no Olandina Freitas progresu atinje 25%, ho totál orsamentu $51.000.

UKL tolu iha suku Irabin de Baixo ba benifísiariu na’in-tolu hanesan Ersilda de jesus, Amelia Quitão no Samuel Florindo, progresu serbisu daudaun atinje ona 71%, ho orsamentu $51.000.

Progresu UKL iha suku Irabin de Cima ba benifísiariu na’in-tolu hanesan Tomas M. Faria, António Pinto no Joaquim da.C Pinto, daudaun ne’e progresu serbisu atinje ona 50%, ho ninia orsamentu $51,000.00.

UKL iha suku Loi Ulo ba benifísiariu na’in-tolu hanesan  Eva Gaspar, Paulino de Jesus no Isabel da Silva, atinji ona 70%, ho ninia orsamentu $51.000.

KOnstrusaun UKL hosi suku Uani Uma ba benifísiariu na’in-tolu, ba benefisiáriu virginia da silva serbisu atinje ona 85% no benifísiariu Armindo Soares, serbisu atinji ba 100%, ho orsamentu totál hamutuk $51.000.00.

UKL ne’ebé harii iha postu administrativu Uatucarbau hamutuk unidade 12 ho totál orsamentu hamutuk $306.000.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here