DILI, 03 juñu 2022(TATOLI)—Polisia Nasionál Timor-Leste (PNTL) liuhosi Polisia Nasionál Serbisu Investigasaun Kriminál (PNSIK) hamutuk ho Autoridade Aduaneira (AA/Alfándega) detein sidadaun ida ho inisiál ADCA ho idade tinan 43 tanba hatama viveiru droga ho tipu marijuana mai Timor-Leste.
Veveiru marijuana ne’e halo apreensaun iha loron 01 juñu liuhosi kooperasaun PNSIK ho Alfandega hodi halo kontrolu ba sasán merkadoria liuhusi marítima.
“Iha prosesu ezaminasaun deteta katak sidadaun hatama viveiru marijuana hosi nia família ne’ebé serbisu iha Irlanda mak haruka mai no suspeitu rasik mak ba simu sasán ida ne’e iha portu Dili,” Portavóz Polísia Nasionál Timor-Leste (PNTL), Superintendente Xefe Armando Monteiro, hateten ba Jornalista sira iha Kuartel Jerál PNTL-Caicoli-Dili, sesta ne’e.
Nune’e, PNTL liuhosi PNSIK aprezenta ona ba Ministériu Públiku hodi submete ba Tribunál Distritál Dili (TDD) atu prosesa suspeitu ba primeiru interogatáriu.
“Viveiru marijuana bele dezenvolve sai barak hodi sirkula iha ita-nia nasaun. Tanba ne’e apela ba sidadaun hotu atu luta kombate no prevene materiál ka aimoruk hirak ne’ebé mak sai preokupasaun boot ba Estadu tanba droga hirak ne’e bele estraga foinsa’e sira,” Portavós ne’e apela.
Jornalista : Felicidade Ximenes
Editór : Florencio Miranda Ximenes
