Jogadór avansadu prinsipál Timor-Leste, Mozinho Barreto De Lima.Imajen/Espesial

CAMBODIA, 03 maiu 2022 (TATOLI)– Jogadór avansadu prinsipál Timor-Leste U-23, Mouzinho Barreto de Lima, sesta ne’e, hala’o ona despedida ho kolega selesaun nasionál U-23, hodi ba hela hamutuk ona ho klube primeira divizaun Cambodia Angkor Tiger FC atu hala’o treinamentu.

Atividade ne’e, hala’o iha Hotel Phnom Penh-Cambodia jogadór númeru kamizola 10 ne’e halo despedida ho treinadór Fabio Maciel da Silva no nia kolega jogadór sira ho matan-been.

“Laran moras, maibé ha’u tenke simu realidade, ida ne’e mak ha’u nia future no ida ne’e mak ha’u nia mehi bainhira tama iha mundu futeból,” dehan Mouzinho ba Agência TATOLI bainhira hakat ain husik ekipa Timor – Leste.

Mouzinho haksumik-an hosi ekipa selesaun Timor-Leste , loron sesta ne’e, iha  tuku 10:00 dader oras Cambodia nian. Ekipa ne’ebé simu nia mak jerente klube, kapitaun klube, Agência ne’ebé lori nia tama ba klube no treinadór Angkor FC rasik.

Jogadór ne’e hasai matan been tanba laran dodok no labele fila hamutuk ba Timor-Leste ho nia kolega sira no nia sei hela mesak iha Cambodia too jogu ramata mak fila mai Timor-Leste.

Nune’e,  nia husu ba jogadór Timoroan hotu atu esforsu-an nafatin hodi hatudu jogu ne’ebé di’ak no dixiplina,  atu nune’e bele hetan oportunidade seluk hodi ba joga iha klube internasionál sira.

“Loron ida mak ita sei hamutuk fali, imi fila karik boa viajen,” dehan Mouzinho.

Mouzinho asina kontratu ho klube Angkor Tiger iha loron 31 maiu foin lalais ho durasaun too dezembru tinan ne’e tuir durasaun liga Cambodia nian.

“Kona-ba saláriu ne’ebé kada fulan nia nia simu hosi klube nia dehan konfidensial no la presiza fo sai ba públiku. Durante hela iha Cambodia klube mak sei tau matan hotu ba nia akomodasaun sira,” nia afirma.

Mouzinho joga iha pozisaun Playmaker ou joga livre iha kampu laran tuir jogadór númeru 10 no joga tuir pozisaun ne’ebé agora dadauk nia joga iha selesaun nasionál hanesan avansadu prinsipál.

Notísia relevante: Klube futeból Cambodia “Angkor Tiger FC” kontrata ona jogadór Mouzinho da Lima

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here