DILI, 03 juñu 2022 (TATOLI)–Ministériu Ensinu Superiór Siénsia no Kultura (MESSK) halo hela esforsu atu inisia dekretu-lei foun hodi hetan fundu apoiu kustu billete no kuarentena ba estudante timor-oan sira ne’ebé hakarak dezloka ba Repúblika Populár Xina atu kontinua estudu.
Ministru Ensinu Superior Siénsia no Kultura, Longuinhos dos Santos, hateten, estudante timor-oan sira ne’ebé sai benefisiáriu ba programa bolsa estudu Governu Xina nian, to’o agora labele fila bá Xina atu kontinua sira-nia estudu tanba Governu laiha verba atu apoiu.
Antes ne’e, MESSK liuhosi karta formál hato’o ona pedidu ba Ministériu finansa (MF) atu hetan verba espesífiku, maibé hetan informasaun katak daudaun laiha ona dalan uza fundu COVID-19 tanba prazu liu ona.
”Kona-ba kustu billete no kustu kuarentena, ita esforsu buka hela lei ida atubele asegura prosesu ida-ne’e. Tanba lei kona-ba fundu COVID-19 nian inválidu ona, entaun ita tenke kria fali dekretu-lei ida hodi asegura situasaun espesífiku ba estudante sira ne’ebé mak atu dezloka ba Xina,” Ministru Longuinhos informa ba Agência Tatoli, iha resintu Parlamentu Nasionál, sesta ne’e.
Notísia relevante: Bolseiru timor-oan 130 husu PR fasilita sira fila ba Xina
Nune’e, esforsu ne’ebé MESSK halo maka hasoru ona Embaixadór Timor-Leste ba Xina atu halo koordenasaun ho Governu Xina atu husu posibilidade fó dalan ba estudante timor-oan sira hodi bele kontinua estudu.
“Horiseik dadeer ha’u hasoru malu ona ho ita-nia Embaixadór Timor-Leste ba Xina, ami na’in-rua halo reuniaun atu halo koordenasaun ho Governu Xina, liu-liu atu fó dalan ba estudante sira atu hala’o estudu iha Xina. Ami na’in-rua ko’alia mós kona-ba kustu billete no kustu kuarentena, ida-ne’e mak agora ita esforsu hela,” nia akresenta.
Aleinde ne’e, MESSK atu prepara dekretu-lei foun ida hodi bele tulun estudante bolseiru ba Xina hetan direitu no bainhira kria ona, ministériu responsável sei aprezenta iha reuniaun Konsellu Ministru hodi bele hetan apresiasaun.
Estudante sira repatria desde tinan kotuk ho versaun la hanesan, balun tanba vizita família no balun mai tanba situasaun COVID-19, seluk fali mai molok pandemia no to’o agora iha hela Timór.
Maski nune’e, Governu Xina kontinua apoiu nafatin osan bolsa estudu ba estudante sira, maibé estudante sira maka halo esforsu rasik ba kustu billete no kustu kuarentena, entaun estudante sira laiha kbiit, tanba ne’e sira husu ba Estadu atu apoiu fundu hodi filafali bá Xina kontinua estudu.
Jornalista : Tomé Amado
Editora : Julia Chatarina
