Bee-moos. Imajen/Espesiál

DILI, 03 junu 2022(TATOLI)—Koordenadór Jestaun Merkadu Taibesi, António Manuel de Araujo, informa hosi tinan 2021 to’o 2022 ne’e merkadu Taibesi menus ba bee-moos.

“Ita-nia bee-moos iha, maibé ita haree volume bee ne’e mak la to’o, tanba ita-nia negosiante iha berkadu Taibesi barak. Tanba ne’e, ami presiza volume bee boot,” António Manuel de Araujo, hateten ba Agência Tatoli, iha nia knar fatin, Taibesi, Dili, sesta ne’e.

Iha Merkadu Taibesi, pesoál merkadu sira loro-loron halo limpeza haree ba lixu no ijiene iha ne’ebá, maibé ligadu ba toilet no haris fatin ne’e pesoál merkadu Taibesi la autoriza ema atu ba haris iha ne’ebá tanba problema menus bee.

“Tanba, agora tempu mudansa klimátika bailoron ona, entaun ita-nia pesoál sira haree menus bee iha ne’ebá,” nia dehan.

Tuir nia, inisiu merkadu Taibesi harii, Emprezáriu no empreza sira tau bee bomba ida iha ne’ebá, hodi halo konstrusaun ikus mai sira husik hela to’o agora seida’uk iha bee kanaliza hosi Governu, liuhosi PAM nian ba to’o agora.

Tanba ne’e, daudaun ne’e negosiante sira sosa rasik bee moos hodi fase sira-nia produtu no uza mós ba sira-nia nesesidade iha merkadu Taibesi. Sira (negósiante) sosa bee hosi tanki ne’ebé faan bee moos entaun ho difikuldade ne’e, jestaun merkadu esforsu nafatin atu oinsá hosi parte Governu haree bee, hodi fornese volume ne’ebé boot ba merkadu Taibesi.

Ho difikuldade ne’e, Jestór Merkadu Taibesi informa ona ba Governu, liuhosi Autoridade Munisípiu Dili, maibé seidauk iha resposta ba asuntu ne’e.

Xefe Departamentu Jestaun no Merkadu, Arthur Henriques, afirma bainhira merkadu Taibesi menus bee-moos tanba konsumidór sira uza bee laiha poupansa. Alende ne’e, karreta bee nian mós sempre lori ba merkadu Taibesi.

“Tanki bee ne’e, ita-nia negosiante sira mós balun sosa no fornese mós hosi ami-nia saneamentu. Kuandu dehan bee-moos laiha, tanba Jestór Merkadu Taibesi ko’alia nia nunka hatene halo relatóriu mai,” nia dehan.

Kona-ba Jestór Merkadu Taibesi hateten nia parte informa ona ba Autoridade Munisípiu Dili, liuhosi Jestaun no Merkadu, maibé seidauk iha resposta.

“Ita-nia Jestór Merkadu Taibesi relata iha ne’ebé, nia servisu besik tinan ida to’o agora seidauk relata mai iha ne’e. Maibé, ha’u sei ba iha ne’ebá, hodi konfirma ho nia.” nia informa.

Tuir dadus hosi Koordenadór Jestaun Merkadu Taibesi, António Manuel de Araujo katak, totál vendedoór ne’ebé hala’o atividade negósiu iha Merkadu Taibesi hamutuk 2.902.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here