Profisionál Saúde-sira hala’o kampaña nasionál fase liman iha arredór HNGV, hodi prevene surtu COVID-19, kinta (14/05). Imajen Tatoli/António Gonçalves.

COVALIMA, 03 juñu 2022 (TATOLI)–Diretór Jerál Servisu Koperativu Ministériu Saúde, Marcelo Amaral hateten, iha selebrasaun loronmundiál fase liman ne’e pesoál saúde (PS) tenke mantein kultura fase liman hodi sai ezemplár ba komunidade.

“Pesoál Saúde hotu tenke iha nia atitude ne’ebé kontinua fase-liman hodi fó ezemplu di’ak ba komunidade, maibé pesoál saúde sira mós iha abilidade sufisiente atu bele mantein kultura fase liman bele eduka ita-nia komunidade,” Marcelo Amaral hateten ba jornalista, bainhira komemora loron mundiál fase liman, iha salaun administrasaun munisípiu Covalima, sesta ne’e.

Maske pesoál saúde sira bele eduka komunidade sira fase liman ho di’ak, maibé bainhira pesoál saúde rasik laiha pratíka no kultura fase liman ne’e difisil.

“Ita hanorin ita-nia komunidade fase liman ho di’ak maibé pesoál saúde laiha kultura atu mantein ninia prátika fase liman, ida-ne’e difisil atu muda komunidade nia atitude tanba ne’e preszja institusionaliza pratika fase liman,” nia dehan.

Tanba, tuir nia, ministra saúde hato’o nia mensajen ho klaru tenke institusionaliza prátika fase liman iha fasilidade saúde, liuhosi gabinete garante kualidade saúde ne’ebé presiza elabora no dezenvolve sistema prátika fase liman hala’o ho rutina no regulár.

Atu garante prátíka fase liman jestór munisípiu no óspital referál, sentru saúde no postu saúde sira tenke asegura pratíka entermu tenke institusionaliza sistema.

“Institusiolinaliza sistema ita tenke iha manuál no matadalan nasionál ne’ebé presiza elabora no fó orientasaun ba pesoál saúde no jestor saúde sira hotu bele institusionaliza prátíka iha fasilidade nune’e bele iha instrumentu kontrola,” nia dehan.

Reprezentante Administradór Munisípiu Covalima, Francisco de Jesus Alves, husu ba komunidadde sira atu mantein nafatin fase liman labele fase liman de’it iha tempu COVID-19 maibé tenke kontinua fase liman hodi prevene moras.

“Ohin ita selebra loron mundiál fase liman hanesan importante ita-nia liman moos ita-bele prevene moras sira-ne’ebé atu tama ba ita-nia isin lolon, ita labele fase liman iha tempu pandemia COVID-19 de’it,” nia hatenen.

Maibé, nia dehan, fase liman sai hanesan kultura ida ba ema-hotu hanesan iha família, fatin públiku, eskola no edifisiu públiku sira, tenke iha fatin fase liman nune’e ema hotu sai toman ho fase liman hodi prevene moras.

Ministériu saúde liuhosi gabinete kualidade saúde hamutuk ho parseiru WHO iha Timor-Leste selebra loron mundiál fase liman iha Covalima ne’e partisipa hosi, diretór óspital referál munisípiu 12 no xefe sentru saúde sira.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here