Prezidente Konsellu Veteranu munisípiu Viqueque, Adriano da Camara ‘Lentil’. Imajen Tatoli/Vitorino Lopes da Costa

VIQUEQUE, 03 juñu 2022 (TATOLI)–Prezidente Konsellu Veteranu munisípiu Viqueque, Adriano da Camara ‘Lentil’, informa, komisaun hahú verifikasaun dadus kombatente libertasaun nasionál hosi postu administrativu Viqueque vila, munisípiu Viqueque.

“Ami hamutuk ho komisaun verifikasaun dadus veteranu, hahú verifika ona dadus hosi postu administrativu Viqueque vila nian ho totál dadus hamutuk na’in-1.750,” Prezidente Konsellu informa ba Agência Tatoli, iha edifísiu Konsellu Veteranu Viqueque, sesta ne’e.

Notísia relevante: SEACLN esplika prosesu verifikasaun dadus veteranu iha Viqueque

Bainhira prosesu verifikasaun dadus kombatente libertasaun nasionál postu Viqueqeu vila ramata, mak sei kontinua halo verikasaun ba veteranu sira ne’ebé rejista iha Dili, tanba rejista iha Dili hosi postu Viqueqeu vila hamutuk na’in-1.360.

“Verifikasaun iha postu ne’e ramata, ami sei kontinua verifika filafali sira ne’ebé remete ba   Dili, tanba remete ba Dili ne’e sira-nia testamuñu hela hotu iha ne’ebá. Nune’e mós ema sira ne’ebé sira serbisu hamutuk mós hela iha Dili. Tanba ne’e remete ba Dili ho sira-nia responsável no sasin sira. Ami hamutuk sei verifika, ami labele halo mesak tanba la hatene sira-nia serbisu kladestina nian,” nia hato’o.

Nia dehan, kona-ba grau sei haree  kombatente sira-nia serbisu, se sira durante tinan naruk liu grau mós sei la’o tuir ida-ne’e, serbisu tinan badak grau mós la’o tuir sira-nian serbisu nune’e grau sei la hanesan.

“Kona-ba verifikasaun ida-ne’e rejistu hosi tinan 2009 nian, agora maka foin ita halo verifikasaun ba dadus sira ne’ebé rejista. Iha verifikasaun dadus postu Viqueque vila ne’e sei ramata iha loron 29 juñu. Se verifika la hotu ami sei estende loron hodi halo verikasaun to’o hotu,” nia akresenta.

Tuir dadus, lista verifikasaun kada suku  hosi postu administrativu Viqueque vila, suku Bahalarauain hamutuk 227, suku Bibileo lista tama verifikasaun hamutuk 246,  suku Caraubalo hamutuk 272, suku Fatudere 75, suku Luca 89, suku Maluru 50,  Uaimori 98, suku Uma-Quic 218, Uma-Uain Craic 215 no suku Uma-Uain Leten 243.

Antes ne’e, Komisaun verifikasaun dadus veteranu hosi postu haat nian hanesan postu Uatulari hamutuk 2.662, postu Uatucarbau 781, postu Ossu 1.904, postu no Lacluta 676.

Enkuantu, dadus veteranu hosi munisípiu Viqueque ne’ebé komisaun verifika ona dadus hamutuk 4.353, maibé seidauk verika totál hamutuk 420, nune’e totál hamutuk 7.773.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here