Saudozu Prezidente Repúblika Nicolau dos Reis Lobato kaer hela toa iha liman no atuál Prezidente CNRT, Xanana Gusmão, kaer kamera hamriik iha sorin karuk. Imajen/Esepsiál.

DILI, 03 juñu (TATOLI)—Atu selebra aniversáriu Funsaun Públika, tinan ne’e, Governu halo abertura no sei realiza jornada la’o tuir ain-fatin Saudozu Nicolau Lobato ne’ebé sei hahú hosi Remexio to’o Turiscai.

Jornada hala’o hosi Ministériu Administrasaun Estatál (MAE), Ministériu Turizmu Komérsiu no Indústria (MTCI), Komisaun Funsaun Públika (KFP), Centro Nacional Chega (CNC), Ministériu Asuntu Kombatente Libertasaun Nasionál (MAKLN).

Prezidente Komisaun Funsaun Públiku (KFP), Faustino Cardoso, hateten atividade ne’e sei realiza mós Chega Tour ho objetivu lori funsionáriu sira ba vizita fatin istóriku iha Dili laran no sei realiza mós iha munisípiu sira.

“Objetivu hosi Jornada “La’o Tuir Ain Fatin” atu buka hasa’e koñesimentu servidór públiku sira nian kona-ba istória rezisténsia liu-liu ba dezafiu sira-ne’ebé mak sira hasoru iha tempu ne’ebá, atu oinsá bele banati tuir prinsipiu no valór sira mak husik hela hosi eroi sira,” Prezidente KFP, Faustino Cardoso, hateten ba jornalista sira, hafoin partisipa lansamentu abertura ba loron funsaun públika, iha resintu MAE, Colmera, Dili, sesta ne’e.

Hanesan tinan hirak liu ba iha ámbitu komemorasaun loron Funsaun Públika, hala’o mós Jornada “La’o Tuir Ain Fatin”, jornada hirak-ne’e hala’o ona ba iha Saudozu Nicolau Lobato no saudozu Vicente Reis “Sahe nian”.

Tanba liuhosi komemorasaun loron nasionál funsaun públika ne’e, atu oinsá fó valorizasaun ba funsionáriu Estadu, funsionáriu permanente no ajente administrasaun públika no funsionáriu kazuál sira-ne’ebé haknar an iha setór públiku.

Nune’e loron abertura ba atividade sira hodi komemora loron Funsaun Públika ne’ebé sei monu iha loron 15 jullu no responsável ba organizasaun eventu refere hosi Ministériu Administrasaun Estatál (MAE) ho tema prinsipál mak
“Hakbi’it Servidór Estadu hodi Asegura Kualidade Servisu ba Públiku iha Ámbitu Desentralizasaun Administrativa no Futuru Poder Lokál Iha Timor-Leste”.

Iha atividade balun mak hala’o iha loron abertura ofisiál hahú ho ko’a fita, loke banner, husik manu pombu, entrega simbólikamente materiál, ekipamentu desportu ho modalidade sira hanesan voleibol, futeból, basketbol no dada tali.

Sei iha mós atividade hirak seluk atu realiza durante fulan juñu nia laran hanesan semináriu, limpeza jerál, bazar baratu. Iha véspera ba loron komemorasaun sei iha atividade marxa saudável no misa agradesimentu.

Ministru Prezidensia Konsellu Ministru, Fidelis Magalhães, hateten Governu ida-ne’e presiza halo melloramentu ba kualidade ba nia funsionáriu sira-nian.

“Governu ida-ne’e halo mellaramentu iha nia mákina no kualidade ba nia funsionáriu sira-nian no okupa ba pasu ida-ne’ebé mak importante ba iha Governu nia polítika ho ida-ne’e mak iha nia inisiativa reforma sira-ne’ebé mak Governu halo hela. Governu kompromitidu no inisiativa ne’ebé sai preokupasaun imi-nian, Governu toma atensaun,” nia dehan.

Ministru Administrasaun Estatál, Miguel Pereira de Carvalho, hateten komemorasaun loron funsaun públika sai hanesan pasu ida hodi rekorda KFP nia ezisténsia.

“Selebrasaun loron nasionál funsaun públika ne’e atu fó hanoin mai ita atu rekorda estabelesimentu funsaun públika no mós rekoñese m’eritu sira hosi funsionáriu públiku nian,” nia dehan.

Realizasaun atividade desportu ba eventu loron nasionál funsaun públika ne’e aloka osan hamutuk kuaze rihun $47.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here