Xefe suku Usitasa'e, Tomás Colo. Imajen espesiál.

OÉ-CUSSE, 03 Juñu 2022 (TATOLI) – Ema na’in-10 hosi suku Usitasa’e, sub-rejiaun Oésilo, Rejiaun Administrativa Espesial Oecusse Ambeno (RAEOA), sai benefisiáriu ba projetu Uma Kbiit Laek (UKL) iha faze daruak tinan 2022.

Xefe suku Usitasa’e Tomás Colo, informa, komisaun verifikasaun ne’ebé lidera hosi Programa Nasionál Dezenvolvimentu Suku (PNDS) akumula ona dadus ba benefisiáriu sira, no konsege rejista kbiit-laek na’in-10, iha suku ne’e hodi sai benefisiáriu ba projetu UKL faze daruak tinan 2022.

“Iha 2021 faze primeiru ha’u-nia suku na’in-rua maka hetan uma ba kbiit laek, hosi aldeia Sifin, neste mumentu nia progresu konklui ona, hein de’it atu halo inaugurasaun, ba faze daruak nian, iha ne’e sira na-in-10 mak sai benefisiáriu, tanba ekipa verfifikasaun sira mai foti ona dadus iha fulan kotuk, rejista kbiit laek na’in-10,” Tomás Ulan, hatete iha Oé-Cusse, sesta ne’e.

Nia informa, iha suku Usitasa’e hamutuk aldeia tolu, faze dahuluk aldeia Sifin benefisiáriu na’in-rua maka hetan ona UKL, entaun iha faze daruák ne’e aldeia rua de’it, aldeia Pune ho aldeia Buqui mak sei hetan-tán projetu UKL ne’e.

Xefe suku ne’e seidauk hatene orsamentu hosi projetu unidade 10 ne’e tanba suku seidauk simu dadus kona-ba implementasaun konstrusaun ba faze daruak nian.

Antes ne’e Diretór Programa Nasionál Dezenvolvimentu Suku (PNDS) Oé-Cusse, Sebastião Tanesi, hatete, lista benefisiáriu ba projetu Uma Kbiit Laek (UKL) faze daruak hamutuk 168, submete ona iha Ministériu Administrasaun Estatál (MAE) atu prepara ba faze implementasaun.

Tanba benefisiáriu hirak-ne’e, prosesa ona iha nivél sub-rejiaun haat no suku 18 ba Uma Kbiit Laek faze daruak nian, ne’ebÉ remata ona iha fevereiru, ho lista finál hamutuk 168.

Nia fó-sai katak, planu atu halo lansamentu hatuur fatuk dahuluk iha Oé-Cusse sei akontese iha fulan-juñu tinan ne’e, tanba iha Oé-Cusse ne’e, mínimu suku ida hetan uma sia (9), iha suku tolu mak hetan uma 10, suku ida maka hetan uma 12 tanba aldeia barak.

Iha faze dahuluk, RAEOA hetan Uma Kbiit Laek hamutuk unidade-36 ba suku 18 kada aldeia ida hetan uma rua, ho medida la hanesan balun nia orsamentu rihun $14 no balun rihun $17.

Nune’e totál orsamentu ne’eb’e aloka ba iha RAEOA hosi Governu Sentrál liuhosi Ministériu Administrasaun Estatál (MAE) hamutuk $611,296.00.

Iha tinan fiskál 2021 Governu harii Uma Kbiit Laek hamutuk unidade-1.254 iha suku 424 iha territóriu nasionál ho montante orsamentu hamutuk $25,000.000 ho kustu ba kada uma purvolta $14,000 to’o $17,000.

Projetu Uma Kbiit Laek, ne’ebé konstrui komposta hosi modelu rua, modelu 48 m2, inklui kuartu tolu (3), sala vizita ida (1) no dapúr ida (1), modelu 37 m2 inklui kuartu rua (2), sala vizita ida (1) no dapur ida (1).

Jornalista   :        Abílio Elo Nini
Editór         :        Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here