Ekipa tékniku EDTL, E.P halo instalasaun ba iluminasaun sira iha estrada ibun Portu Dili nian, segunda (16/05). Imajen Tatoli/Francisco Sony.

DILI, 03 junu 2022 (TATOLI)—Komisáriu Ezekutivu Servisu Tékniku Eletrisidade Timor-Leste, Empreza Públika (EDTL, E.P), Latino Jerónimo, informa EDTL, E.P normaliza ona iluminasaun públika iha estrada protokolu, nune’e bele fó naroman ba komunidade nia movimentu iha tempu kalan.

Notísia RelevanteEDTL, E.P hahú instala iluminasaun iha estrada protokolu

“Antes 20 maiu, iluminasaun sira iha Díli laran liu-liu estrada protokolu rekoopera hotu ona. Dala ruma iha lampu ida no rua mak falla, tanba dala ruma lampu mak aat no ligasaun hanesan kontaktór mak falla maibé en jerál agora di’ak hotu,” Latino Jerónimo hateten ba Agência Tatoli, via telefóne, sesta ne’e.

Iha iluminasaun públiku tolu ka haat ne’ebé fora hosi estrada prinsipál, ekipa tékniku EDTL, E.P sei halo manutensaun.

“Fatin ida-ne’ebé babain ema halo movimentasaun barak, ita sei kontinua halo iha fulan ida-ne’e ba oin, ita-nia sasán iha ita hein monta de’it,” nia dehan.

Tuir nia, iluminasaun públiku iha estrada protokolu normaliza hikas, sasán ne’e dala ruma bele aat maibé iha iluminasaun balun ne’ebé aat ida no rua, EDTL, E.P identifika hodi troka.

“Maibé, maioria ita bele dehan 90% ba leten normaliza hotu ona, hela estrada ne’ebé seksaun tanba fora hosi estrada protokolu, ita sei prepara atu halo,” nia dehan.

Iluminasaun públiku iha estrada seksaun hanesan fatin ne’ebé movimentasaun barak, hanesan iha parte Delta no tesik ba Manleuana.

“Entaun, ida-ne’e, ita fokus ba área sira-ne’ebé iha movimentasaun barak hafoin ita fokus fali ba fatin seluk,” Komisáriu Ezekutivu, EDTL, E.P ne’e hateten.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here