Fornesedór sira prepara ai-han merenda eskolár ba estudante Ensinu Báziku Filiál (EBF) Mabil-Oa, suku Saburai, postu administratrivu Maliana, munisípiu Bobonaro, maibé ho kondisaun dadur ne’ebé la saudável tanba anin sobu. Imajen Tatoli/Sergio da Cruz.

BOBONARO, 03 juñu 2022 (TATOLI) –Programa merenda eskolár importante tebes ba estudante sira tanba atu hasa’e nutrisaun maibé kondisaun dapur tenke saudável ba kruzineira sira.

Kondisaun dapur ne’ebé la saudável akontese ba Ensinu Bázika Filiál (EBF) Mabil-Oa, suku Saburai postu administrativu Maliana, munisípiu Bobonaro tanba dapur ne’e anin sobu beibeik.

Koordenadór EBF) Mabil-Oa, suku Saburai, Joao Lopez. Imajen Tatoli/Sérgio da Cruz.

Koordenadór EBF Mabil-Oa, Joao Lopez, haktuir iha tinan kotuk profesór sira konsege harii uluk dapur besik eskola ninin maibé ladura tempu naruk tanba kondisaun dapur refere konstrui modelu provizóriu de’it nune’e iha  tempu bailoron, anin sobu hotu kedas.

Haree ba situasaun ne’e, profesór sira buka meiu transforma sala-aula tuan ida sai fali dapur tanba hakarak estudante sira konsumu ai-han merenda eskolár ho fatin dignu, maibé iha fulan-janeiru akotese tán anin ho volume boot sobu tomak kalen iha kakuluk leten tanba aula tuan ne’e konstrui tempu naruk ona.

“Anin loke tomak kalen sira to’o buka la hetan, entaun agora sasán sira-ne’e ami tau fali iha sala laran, bainhira kuzineira sira atu te’in, foti sasán sira-ne’e ba te’in iha li’ur depois merenda hotu lori tama fali mai, tanba ta’uk lakon,” nia informa ba Tatoli, iha kna’ar-fatin, suku Saburai, sesta ne’e.

Joao akresenta, situasaun ne’e difikulta tebes fornesedór sira prepara ai-han ba estudante sira, liuliu iha tempu udan tanba kondisaun dapur ne’ebé anin sobu ninia kakuluk mós hahú lahuk ona.

Kondisaun dapur merenda eskolár iha EBF Mabil-Oa, suku Saburai, postu administrativu Maliana, munisípiu Bobonaro, ne’ebe anin-sobu ninia kakuluk. Imajen Tatoli/Sérgio da Cruz.

Maske iha ameasa nia laran maibé obrigatóriu tenke kontinua ulitiza fatin ne’e hodi prepara ai-han, tanba kada loron estudante sira iha direitu asesu ba ai-han merenda eskolár iha oras intervalu.

Situasaun ne’e parte eskola halo ona proposta ba organizasaun naun-governamentál balun apoia materál konstrusaun maibé pedidiu hirak-ne’e konsege responde de’it ho kalen-tahan 76 no pregu kilu-rua de’it, entaun la sufisiente tanba ai-dodok hotu ona.

“Ami kontinua atu halo maibé la sufisiente tanba ai laiha, ne’ebé ami husu ba Ministériu Edukasaun, Juventude no Desportu atu apoia materiál konstrusaun,” nia husu.

Alende problema kona-bá ba dapur, problema seluk ne’ebé eskola ne’e enfrenta mak sala aula la sufisiente, tanba atualmete iha de’it aula tolu akumula estudante sira ho númeru  boot nune’e junta de’it ho aula profesór.

Nune’e mós dezde establesimentu eskola refere iha tinan 2015 to’o agora seidauk iha moru protesaun, tanba ne’e iha tempu bailoron bibi no karau movimenta livre iha areadór eskola nian.

“Dadeersan kuandu atu hahú aula, estudante sira tenke hamoos karau-tén no bibi-tén, maibé agora sei di’ak oituan tanba udan be animal ema kesi de’it, maibé kuandu bailoron animál sira mai toba hotu iha eskola oin tanba ita-nia lutu laiha,” nia hateten.

Daudaun ne’e totál estudante iha eskola ne’e hamutuk na’in-102 komposta hosi feto 55 no mane 47 ho totál profesór permanente na’in-tolu, kontratadu rua  no reklamadu na’in- tolu. EBF Mabil-Oa ne’e establese iha tinan 2015 liuhosi Projetu Pakote Referendu (PPR).

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here