Administradór postu administrativu Maliana,Tomás Lacu-Loe, ofisialmente entrega ai-han bázika ba komunidade Saburai. Ai-haan ne’e apoia hosi CVTL Filiál Bobonaro. Imajen Tatoli/Sérgio da Cruz.

BOBONARO, 03 junu 2022 (TATOLI) – Cruz Vermelha Timor-Leste (CVTL) Filiál Bobonaro, serbisu hamutuk ho International Federation Read Crous (IFRC) sesta ne’e distribui ai-han bázika ba uma-kain hamutuk 298 iha suku Saburai, postu administrativu Maliana, munisípiu Bobonaro.

Apoia hirak-ne’e hetan doasaun orsamentu hosi Cruz Vermelha Austrália, no ai-han bázika ne’ebé distribui ba benifisiáriu sira-ne’e mak hanesan; foos marka globus kilograma 20 saka 149, foos-rai kilograma 10 saka 596 ho sasán pakote 298. Kada pakote ense ikan sardina lata 18, fore-mungu lata rua, batar lata-rua no masin pakote 13.

Prezidente Konsellu Diretivu CVTL Filiál Bobonaro, António Santa Cruz, esplika apoiu ne’e oferese bazea ba avaliasaun ne’ebé ekipa sira halo iha tinan kotuk identifika katak, família hirak-ne’e  durante pandemia Covid-19 manus rendimentu hodi responde ba nesesidade uma-laran tanba impaktu hosi implementasaun serka sanitária ne’ebé limita atividade balun.

“Apoiu ida-ne’e atu responde netik ita-boot sira-nia preokupasaun, ha’u husu ba komunidade sira, ita labele haree ba ninia kuantidade no ninia valór, maibé ita-boot sira nia kontribuisaun importante tebes ba ami, atu dehan tán ami iha mós tanba ita-boot sira, ami mesak sei labele halo buat ida,” nia hato’o iha intervensaun ba atividade distribuisaun ne’e.

Biban ne’e, António Santa Cruz enkoraja komunidade suku Saburai no komunidade iha Bobonaro laran tomak, atu kontinua koopera ho ekipa CVTL sira nune’e ba oin impelementasaun atividade hotu bele la’o ho sesesu tanba CVTL nia papél atu apioa voluntáriu ba komunidade ne’ebé presiza maibé la halo diskriminasaun.

Reprezentante IFRC, Macario Santos Lopez, reforsa esforsu voluntarizmu ne’ebé ekipa CVTL halo atu rekupera ekonomia komunidade ne’ebé impaktu hosi pandemia globál Covid-19.

“Apoiu ne’ebé CVTL halo hetan kooperasaun hosi doasaun Cruz Vermelha Austrália ne’ebé mak koopera liuhosi federasaun hodi fó konfiansa ba sira halo intervensaun ba komunidade sira. Maski ho montante ne’e la boot,” nia hateten.

Sorin seluk, Administradór postu administrativu Maliana, Tomás Lacu-Loe, konsidera asaun hirak-ne’e iha valór umanu ne’ebé boot tebes tanba momentu pandemia Covid-19 komunidade sira iha suku ne’e barak mak la hetan rendimentu.

“Maski apoiu mai kleur maibé ha’u agradese, ha’u-nia komunidade sira-ne’ebé iha momentu ne’e sulan de’it iha uma, kada loron atu hetan de’it dolar ida mós susar la halimar, ne’ebé labele haree ba ninia kuantidade maibé hanesan umanu sira mós bele tulun ona ita,” autoridade ne’e agradese.

Xefe suku Saburai, Vicente dos Santos, konsidera apoia hirak-ne’e bele hakmaan komunidade sira-nia moris iha loron balun.

“Ita-boot sira mak hetan ne’e boot la halimar, sira mai fó subsidiu oituan, ita susar sira fó oituan-oituan la fó barak, maibé ita-boot sira-ne’ebé hetan tenke agradese,” nia katak.

Atividade ne’e realiza iha suku Saburai durante loron rua, loron dahuluk iha aldeia  Mabil-Oa no Kosál no loron-sábadu kontinua ba aldeia Aitasi. Tuir planu semana oin iha loron 06 to’o 07 fulan ne’e sei kontinua distribui ba komunidade sira iha suku Leo-hitu, postu administrativu Balibo, munisípiu Bobonaro.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here