COVALIMA, 03 juñu 2022 (TATOLI)–Koordenadór Bee Timor-Leste, Empreza Públiku (BTL, E.P) Covalima, Castro Dody Ramos, hateten hafoin lee notísia iha portál Agência Tatoli, I.P, nia parte sei orienta ekipa tékniku BTL, E.P Covalima atu identifika problema EBC Beco la asesu bee-moos.
Notísia Relevante: Eskola Bázika Sentrál Beco la asesu bee-moos
“Ha’u foin asesu informasaun liuhosi publikasaun notísia hosi Agência Tatoli katak, EBC Beco enfrenta problema bee-moos. Tanba ne’e, ha’u ho ekipa sei tun ba terrenu hodi identifika iha terrenu, hafoin ami haruka karta ba iha nasionál,” Castro Dody Ramos hateten ba ba Agência Tatoli liuhosi telefónika, sesta ne’e.
Tanba, tuir nia, problema bee-moos iha área urbana bainhira haruka karta ba iha Bee Timor-Leste, Empreza Públiku (BTL.EP) ho ekipa tun kedas ba terreñu hodi bele rezolve.
Nia fó ezemplu, foin lalais eskola bázika sentrál Zumalai sira-nia bee la sai entaun hafoin administradór Zumalai haruka karta mai iha BTL, E.P entaun ekipa sira tun kedas ba terrenu hodi haree no hadi’a.
“Kona-ba EBC Beco la asesu bee-moos, ha’u seidauk hetan informasaun tanba ne’e bainhira problema bee-moos BTL, E.P hodi foti asaun liuhosi ita identifika problema, ami bele hato’o ba iha nasional hodi bele foti asaun,” nia informa.
Antes ne’e, iha loron 27 fulan maiu tinan ne’e, Diretór eskola bázika Centrál Beco, Quintino Quintão, hateten Eskola Bázica Central (EBC) Beco la asesu bee-moos, tanba ne’e estudante sira lori bee hosi uma mai iha eskola hodi bele uza.
“Ami-nia bee posu iha ne’ebé ami na’in hamoos iha tinan 2015 ne’ebé ami uza ba nesesidade loro-loron, maibé iha tempu bailoron bee posu ne’e maran, entaun estudante sira tenke lori bee hosi uma mai iha eskola hodi uza,” nia dehan.
Manorin na’in ne’e mós informa, estudante sira-ne’ebé eskola iha eskola ne’e hamutuk 254.
Jornalista : Celestina Teles
Editór : Cancio Ximenes
