Prezidente Konsellu Administrasaun BTL, E.P, Carlos Peloi dos Reis, asina akordu ho Diretór empreza Wetodo Unipesoal Lda, Mário dos Reis, hosi halo melloramentu sistema bee-moos iha postu administrativu Soibada, iha salaun Caicoli, sesta (03/06). Imajen/BTL

DILI, 03 juñu 2022 (TATOLI)—Bee Timor-Leste, Empreza Públika (BTL, E.P), sesta ne’e, asina kontratu ho empreza Wetodo unipesoal, Lda, ne’ebé sei halo parseria ho empreza Talisahe Unip, Lda, hodi halo melloramentu ba sistema bee-moos iha postu adminitrativu Soibada, munisípiu Manatuto.

“Ohin ita kontratu empreza Wetodo atu ba oin bele halo melloramentu sistema bee-moos hodi distribui ba ita-nia komunidade iha Soibada, tanba komunidade iha área ne’ebá tinan naruk la asesu bee-moos,” Prezidente Konsellu Administrasaun BTL, E.P, Carlos Peloi, hateten, iha salaun Caicoli.

Nia dehan, empreza Wetodo ne’ebé ohin asina kontratu sei implementa projetu ho durasaun fulan-neen, hahú juñu no ramata iha 01 dezembru 2022.

“Ohin ita asina ona, hein ita fó orientasaun nune’e sira bele halo serbisu ho lalais. Projetu ne’e rasik realiza ho orsamentu hamutuk $772.944,46,” nia akresenta.

Notísia relevante: BTL mellora sistema abastesimentu bee no saneamentu hodi rekolla reseita

Iha fatin hanesan, Diretór empreza Wetodo, Mário dos Reis Amaral, hateten, hanesan empreza ne’ebé hetan fiar, komprometidu ba oin sei serbisu másimu nune’e bele ramata tuir tempu ne’ebé determina ona.

“Ami prontu realiza projetu tuir tempu iha kontratu, katak dezembru ne’e ita-nia komunidade tenke asesu ona bee-moos,” nia dehan.

Nune’e mós, Administradór postu administrativu Soibada, Luis Gongaza da Silva, agradese ba VIII Governu, liuhosi BTL, E.P bele oferese ona projetu sistema melloramentu bee-moos ba komunidade Soibada.

“Ami-nia komunidade tinan naruk  halerik ba bee-moos,” nia tenik.

Sistema melloramentu bee-moos kobre kuaze distánsia kilómetru 25,6, ne’ebé suku haat mak sei sai benefisiáriu hanesan Samoro, Manlala, Leohat, no fatumaquerec, ho benefisiáriu ba projetu ne’e hamutuk uma-kain 280 ho totál populasaun 1.680.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here