Bibi-malae. Imajen/Espesiál.

DILI, 03 junu 2022 (TATOLI)—Xefe Departamentu Jestaun no Merkadu, Arthur Henriques, informa iha fulan-maiu tinan ne’e, Autoridade Munisípiu Dili liuhosi Jestaun no Merkadu halo apreensaun ba bibi ualu (8) ne’ebé halo movimentu iha estrada públiku iha postu administrativu Cristo Rei no Don Aleixo.

“Iha fulan-maiu tinan ne’e ami halo apreensaun ka kasa bibi ualu (8) ne’ebé kompostu hosi Cristo Rei ami kaer haat no Comoro haat,” Arthur Henriques hateten ba Agência Tatoli, iha nia knar fatin, Matadoru, Dili, sesta ne’e.

Bibi ualu (8) ne’e Ekipa Jestaun no Merkadu kaer, tanba iha fulan-maiu tinan ne’e Timor-Leste komemora Restaurasaun Independésia ba dala-XX, bainaka sira hosi estranjeiru mai barak maibé  animál sira halo movimentu iha estrada públiku.

“Tanba, tuir ita-nia dekretu-lei númeru 33/2008 katak, animál sira-ne’ebé laiha luhan ka fuik hela iha dalan ibun, ami kaer moris ka oho,” nia dehan.

Maske nune’e, nia parte husu ba komunidad bainhira hakarak haki’ak animál haki’ak iha área rurál ka fatin ne’ebé merese atu haki’ak animál, maibé tau iha luhan, nune’e animál sira labele halo movimentu iha sidade laran.

Alende ne’e, ni husu atu labele husik animál konforme tuir na’in nia hakarak, tanba ida-ne’e fó perturbasaun ba movimentu transportasaun no ba komunidade bele akontese dezastre. Tanba ne’e, husu ba komunidade ne’ebé haki’ak animál ho di’ak, atu nune’e iha Autoridade Munisípiu Dili mós la’o haree iha orden no sei la foti tan medida kona-ba animal.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here