DILI, 03 juñu 2022(TATOLI)— Komadante Jerál Polisia Nasionál Timor-Leste (PNTL), Komisáriu Faustino da Costa, sesta ne’e, fó pose ba Superintendente Asistente Eduardo Campos sai Komandante Polísia Munisípiu Espesiál Ataúro ho nia-Segundu Komandante PNTL Munisípiu Ataúro, Inspetór Xefe João Ceras da Silva.
Biban ne’e, Komadante PNTL Munisípiu Espesiál Ataúro, Eduardo Campos agradese ba Komadante Jerál PNTL, Faustino da Costa, ne’ebé fó konfiansa hodi nomeia sai Komandante munisípu Ataúro tuir estatutu lei PNTL ne’ebé mak Governu aprova.
“Hau-nia misaun prinsipál ne’ebé mak assume sei esforsu hotu atu servisu hamutuk ho komunidade no autoridade sira atu garante seguransa pás no estabilidade iha Ataúro. Hodi nune’e Ataúro-oan moris iha situasaun ne’ebé seguru no hakmatek,” Komandante PNTL Ataúro ne’e hateten hafoin simu pose iha Kuartél Jerál, Caicoli-Dili.
Iha fatin hanesan, Komandante Jerál PNTL, Komisáriu Faustino da Costa, afirma durante ne’e Ataúro sai hanesan pertense ba munisípiu Dili, maibé Governu deside sai ona munisípiu espesiál hodi jere nia prosesu administrative rasik.
Nune’e, PNTL hanesan instituisaun Estadu ne’ebé makimplementa lei no orden hahú halo nomeasaun ba Komandante munisípiu espesiál Ataúro no koloka kedas segundu komandante atu halao kna’ar hamutuk ho autoridade iha munisípiu Ataúro hodi asegura pás no estabilidade atu kontribui ba prosesu dezenvolve.
“Ha’u husu nafatin ita boot sira bele kontinua kna’ar ho responsabilidade ne’ebé mak komandu atribui ba ita boot sira,” nia sujere.
Alende ne’e, Komandante sira ne’ebé simu pose nain-neen kompostu husi Superintendente Polísia Eugenio Perreira hodi asume kargu Komandante Unidade Polísia Marítima,Superintendente Assitente Albino Mouzinho asume Xefe Departamentu Polisia Tránzitu Nasionál, Superintendente Asistente Martinho B. Deus assume kargu segundu Komandante PNTL munisípiu Covalima, Superintendente Asistente Inacio Amaral mak asume kargu segundu Komandante Munisípiu Ermera, Superintendente Asistente Eduardo Campos mak asume kargu Komadante PNTL Munisípiu Ataóro, Inspetór Xefe João Ceras da Silva asume kargu Segundu Komadante PNTL Munisípiu Ataóro.
“Agradese dahuluk ba komandante sesante sira tanba ho ita boot sira nia esforsu no sakrifisiu ne’ebé halo durante ita boot sira-nia mandatu hodi komanda no asegura servisu sira ne’ebé la’o ho di’ak tebes,” Komandante Jerál ne’e agradese.
Jornalista : Felicidade Ximenes
Editór : Florencio Miranda Ximenes
