Reprezentante WFP iha Timor-Leste, Dageng Liu. Imajen TATOLI/Francisco Sony

DILI, 02 juñu 2022 (TATOLI)—Programa Ai-han Mundiál Nasaun (WFP, digla inglés) no Ministériu Agrikultura Timor-Leste (MAP), kinta ne’e, lansa avaliasaun dahuluk hamutuk ho Ministériu Finansa hodi prodús relatóriu monitorizasaun ba presu regulár, hodi monitóriza impaktu COVID-19, Konflitu Globál no Mudansa Klimátika ba presu merkadória.

“Informasaun kritiku ida-ne’e importante tebes atu determina ita-nia nesesidade, prioridade no intervensaun sira ba oin,” Reprezentante Programa Ai-han Mundiál Nasaun (WFP, digla inglés) iha Timor-Leste, Dageng Liu, hateten iha ámbitu lansamentu avaliasaun merkadu no relatóriu monitorizasaun presu, iha City 8, Manleuana, Dili, kinta ne’e.

Avaliasaun merkadu ne’e konduta iha munisipiu tolu mak Baucau, Manufahi no Bobonaro, ho objetivu atu hatene kona-ba oinsá merkadu lokál bele ajuda uma-kain sira, hodi asegura seguransa ai-han no kompleta nesesidade esensiál, halo avaliasaun ba viabilidade, risku no impaktu ba intervensaun sira no komprende oinsá bele haforsa merkadu lokál.

Tanba ne’e, WFP hamutuk ho Diretór Jenerál Estatistika (MDF) no Ministériu Agrikultura no Peska realiza monitorizasaun presu semanál ba merkadu sira iha territóriu Timor laran iha munisipiu 12 hanesan Ainaro, Aileu, Bobonaro, Baucau, Dili, Ermera, Lautem, Liquiça, Manatuto, Viqueque, Covalima no Oé-Cusse, hodi monitoriza impaktu COVID-19, Konflitu Globál no Mudansa Klimátika ba presu merkadória.

“Nune’e, WFP sei kontinua fó apoiu ba Governu Timor-Leste hodi responde ba impaktu globál no planu,” nia dehan.

Ministru Agrikultura no Peska (MAP), Pedro dos Reis, hateten projetu ne’e nu’udar parte ida hosi Nasionál Follow Up ba Sistema Ai-han Mundiál ne’ebé Governu Timor-Leste partisipa ativu tebes, hosi ne’e mak Governu bele hola pozisaun ba iha transformasaun ba sistema ai-han nian.

“Relatóriu ida-ne’e, importante tebes ba ita tanba relatóriu ne’e ita lansa no ita fó sai ho situasaun ne’ebé ita hasoru, hanesan pandemia COVID-19, Mudansa Klimátika no situasaun ne’ebé ita hotu hatene dadauk katak krize ne’ebé iha Ukraina ho Rusia,” nia dehan.

Governu liuhosi Ministériu Agrikultura no Peska halo ona esforsu makaas, oinsá bele hasa’e produsaun no halo diversifikasaun ba programa hodi hasa’e produsaun iha rai-laran, atu nune’e bele garantia no bele fasilita ba iha programa merenda eskolár, sesta bázika no atividade seluk.

“Ida-ne’e kondisaun ida-ne’ebé di’ak tebes ba Ministériu Agrikuktura, tanba ho programa sira-ne’e pelemenus bele ajuda no tulun ona ita-nia agrikultura sira iha terrenu, hodi motiva sira hodi kuda di’ak liután. Tanba ne’e, ha’u-nia hanoin ita hotu hatene katak foin lalais ita iha Komisaun entre Ministériál ne’ebé mak lidera direta hosi ita-nia Primeiru-Ministru ne’ebé iha Ministériu na’in hirak hola parte iha ne’ebá, ho orientasaun klaru katak programa sira-ne’ebé temi hanesan sesta bázika. Tanba ita la’o períodu dahuluk liu ona agora ba segundu, entaun nia fokus liubá 75% tenke produtu lokál. Se ida-ne’e ita hotu servisu hamutuk, liuhosi lansamentu ba presu ai-han ne’ebé iha, bele hetan mós solusaun ruma ba futuru, entaun bele garantia ona vontade agrikultura sira iha terrenu,” nia dehan.

Vise Ministru Komérsiu no Industria, Domingos Lopes Antunes, agradese ba WFP ba lalaok kona-ba inisiativa hamutuk ho Governu Timor-Leste, liuhosi Ministériu Agrikultura halo hela estudu ba merkadória no presu ai-han nian.

“Iha tinan hirak liubá, ha’u rasik asiste relatóriu sira-ne’e hahú hosi tinan kotuk, importante atu halo kontrolu no mós fiskalizasaun ba presu hahan ba nesesidade bázika sira hotu iha rai-laran. Liu-liu bainhira ita hasoru surtu COVID-19, ne’ebé Governu atu halo esforsu hodi lori fila ita-nia ekonómia. Tanba ne’e, ha’u hanoin importante tebes parseria ne’e, obrigadu barak ba WFP ho servisu Ministériu Agrikultura halo,” Governante ne’e hateten.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here