Diretór SEFOPE Munisipiu Bobonaro, Calisto Mau-Ati. Imajen Tatoli/Sérgio da Cruz.

BOBONARO, 02 juñu 2022 (TATOLI) – Sekretaria Estadu Formsaun Profesional no Empregu (SEFOPE) Munisípiu Bobonaro, planeia realiza programa akonsellamentu karreira iha Eskola Tékniku Agrikola (ETA) Mole-Ana, suku Ritabou, postu administrativu Maliana, munisípiu Bobonaro.

Diretór SEFOPE Munisípiu Bobonaro, Calisto Mau-Ati, esplika programa ne’e hanesan planu anuál SEFOPE nia atu fahe informasaun hodi fasilita joven sira atu buka dalan asesu ba kampu trabaLlu, nune’e estudante finalista sira bainhira remata eskola sekundariu bele hili ona opsaun ba sira-nia moris rasik.

“Ami-nia planu iha loron 15 fulan ne’e sei halo iha eskola SPP Mole-Ana, inklui mós ho sira-nia sentru ida iha-ne’ebá, ami fahe informasaun oituan kona-ba prosesu serbisu nian, aban bainrua karik ekonomia faimília la sufisiente atu sustenta sira kontinua eskola. Sira bele hatene ona dalan ba tuir formasaun lian korea no grupu auto-empregu,” Nia informa ba Tatoli, iha kna’ar-fatin, kinta ne’e.

Molok realiza programa ida hanaran espozisaun karreira, SEFOPE bolu reprezentante estudante sekundáriu sira hotu iha munisípiu Bobonaro akumula iha salaun ida nune’e emprezariu lokál sira no instituisaun relevante fahe imformasaun kona-bá empregu nian.

Programa refere Internationl Labour Organization (ILO) mak apoia orsamentu, maibé iha tinan hirak liubá konsege paradu, entaun SEFOPE hola inisiativa realiza fali Programa Akonsellamentu Karreira nune’e bele prepara joven sira koñesimentu atubele asesu ba kampu traballu.

“Maske ita iha orsamentu kiik maibé kada trimestre, ami nafatin realiza programa ne’e, depende ba ita-nia atividade, entaun kada eskola ita akumula de’it estudante 50 atubele fó-hán no hemu,”  nia hateten.

Programa ne’e iha tinan kotuk realiza ona iha eskola sira iha kapitál Maliana, hanesan Ensinu Sekundária Jerál númeru I Don Martinho da Costa Lopes Maliana, Téknika Informátika (IT) Maliana no Tékniku Vokasionál numeru II Malibaca, Yamato, Maliana.

Hafoin remata hosi ETA Mole-Ana sei kontinua kedas ba iha Eskola Sekundária númeru III Bobonaro, no eskola sekundáriu sira iha postu administrativu Cailaco no Balibo hanesan eskola Katólika ida iha área Palaka no seluk tan.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here